Жените што влегуваат во менопауза би требало редовно да ја контролираат штитната жлезда, бидејќи во петтата деценија слабее и полека исчезнува дејствувањето на хормоните. Со рутинска анализа на крвта може да се одреди нивото на хормоните на тироидата и да се откријат евентуалните нарушувања во нејзиното работење.

Статистиките покажуваат дека најмалку три од десет жени во текот на животот страдаат од нарушување на тироидната жлезда. Лекарите претпоставуваат дека тој број е поголем бидејќи многу жени имаат благи симптоми што понекогаш не ги забележуваат. Со оглед на тоа дека оваа мала жлезда е исклучително важна за нормално функционирање на организмот, важно е навреме да ги препознаете нарушувањата во нејзиното работење.

Причините за нарушување на работата на штитната жлезда уште не се потполно познати, но тука се генетиката, хроничните инфекции на оваа жлезда, па и стресот. Проблемот станува уште поизразен во менопаузата кога престанува заштитното дејство на хормоните. Нарушувањата на штитната жлезда се комплексни и различни, а проблемот настанува кога таа ќе стане хиперактивна или забавена.