Во Центарот за култура „Трајко Прокопиев“ во Куманово на 25 и 26 мај беше одржан првиот Меѓународен фестивал на проза.

– Целта на манифестацијата беше да се доближи книжевната прозна продукција до читателската публика, да се запознаат со домашните и авторите од странство и нивните дела, што сигурни сме дека ќе придонесе до формирање на едно критичко, субјективно мислење, ќе се поттикне и формира идниот читател – посочија иницијаторите на фестивалот од ЦК „Трајко Прокопиев“.

Првата фестивалска вечер се реализираше како дискусија за женското писмо и Балканот, а за тоа дискутираа Јорданка Белева од Република Бугарија, Оливера Ќорвезироска од Република Северна Македонија и Лејла Каламујиќ од Босна и Херцеговина. Модераторка беше Фросина Крушкаровска.

На втората фестивалска вечер извадоци од своите прозни дела читаа писателите Николина Андова Шопова, Жарко Кујунџиски, Иван Шопов, Давор Стојановски, Лира Бојку и Фејзи Бојку. Модератор на втората вечер беше писателот Петар Андоновски.

– Очекуваме дека како и оваа и идната година Фестивалот повторно ќе добие поддршка од Министерството за култура и Општина Куманово со што истиот ќе стане традиционален, со нови пропратни содржини кои ќе го популаризираат пишаниот збор – велат организаторите на Меѓународниот фестивал за проза во Куманово.