По јулските проекции, филмската ревија во Кинотека во чест на јубилејот – 75 години од основањето на Друштвото на филмски работници (ДФРМ) продолжува и во септември.

На 3 септември програмата ќе биде отворена со играниот филм „Трето полувреме“ на Дарко Митревски, а во деновите што следуваат публиката ќе има можност да ја проследи јубилејната филмска ревија од избрани македонски филмови кои оставиле длабока трага во нашата кинематографија.

На 4 септември ќе бидат прикажани филмовите „Денес треба нешто да се случи“ (1978) и „Ругање со Христос“ (2018); на 5 септември: „Северен пол“ (2012) и „Соба со пијано“; на 10 септември на програмата се „Види ја ти неа“ (2017) и „Домаќинство за почетници“ (2023); на 12 септември ќе бидат прикажани документарниот филм „Вирово“ (1968) и играниот филм „Сестри“ (2021). Влезот на сите проекции е бесплатен.

– Јубилејната филмска ревија претставува потсетување на 75 години активна работа на Друштвото на филмски работници на Македонија и истовремено – почит кон сите генерации визионери, филмски автори, актери, филмски работници и соработници кои низ сите овие години ја граделе и сѐ уште ја градат македонската кинематографија. Ревијата отвора простор за средби, дијалози и нови идеи за иднината на седмата уметност во нашата држава. Во време кога вниманието е фрагментирано, јубилејната ревија нѐ потсетува дека добриот филм останува моќна сила – да нѐ трогне, инспирира и обедини – вели Игор Иванов – Изи, претседател на ДФРМ.