Чешката полиција апелира за информации за украден тркачки коњ кој наводно му припаѓа на чеченскиот лидер Рамзан Кадиров. Зазу, коњ вреден околу 20.000 долари, исчезнал помеѓу петокот навечер и саботата наутро. Кадиров имал уште еден коњ кој уште бил во шталата во Чешка, пренесува „Би-Би-Си“.

Коњите биле задржани во Чешка поради санкциите воведени по нелегалната анексија на Крим од страна на Русија во 2014 година. Рамзан Кадиров е силен сојузник на Владимир Путин, иако тој неодамна го критикуваше руското воено раководство поради неговата стратегија во Украина. Минатата година, чешкото радио објави дека тркачкиот коњ на чеченскиот лидер е регистриран во Чешкиот џокеј клуб од 2012 година.

Зазу исчезнал од шталата Дархорс во близина на градот Руднице над Лабем, 50 километри северно од главниот град Прага, соопшти полицијата. Во соопштението се наведува дека синџирот што ја прицврстувал вратата на шталата бил отстранет и дека коњот бил украден.

Тие апелираат до јавноста за какви било информации за тоа каде се наоѓа Зазу, истакнувајќи дека 16-годишниот коњ има карактеристична неправилна бела ѕвезда на челото. Чешкото радио објави дека веќе во јануари минатата година двајца мажи се обиделе да украдат два коња од истата штала.

Само неколку недели пред почетокот на руската инвазија на Украина, мажи кои зборуваат руски пристигнале во шталата тврдејќи дека имаат инструкции да ги однесат коњите во Полска. Тие го оправдале барањето со тврдење дека животните под санкции може да се преместуваат преку границите, под услов да не ја напуштат Европската унија.

Сопственикот на шталата потоа ги заклучил шталите за да спречи крадење на коњите. Тој вели дека двајцата мажи поминале пет дена седејќи во комбе паркирано пред влезот на шталата, пред конечно да си заминат. Како дел од санкциите, сите наградни пари од коњските трки треба да бидат наменети за одржување на коњите, а остатокот да е замрзнат, што го налути Кадиров.

„Што може да се каже за човековите права на Запад, ако грубо ги кршат правата на коњите, најмирните, љубезните и најнежните животни во светот? – праша Кадиров по тој потег на Фејсбук.