Во просториите на Амбасадата на Република Северна Македонија во Братислава, Словачка, на 22 октомври 2024 година, се одржа промоција на првиот учебник за изучување на македонски јазик за Словаци (Macedónčina pre Slovákov / Македонски јазик за Словаци), од авторите вон. проф. д-р Игор Станојоски и вон. проф. д-р Звонко Танески.

Рецензенти на учебникот се универзитетските професори Павол Жиго и Мартина Иванова од словачка страна, како и универзитетските професори Гоце Цветановски и Снежана Петрова-Џамбазова од македонска страна.

На настанот присуствуваа претставници на академската заедница, претставници на дипломатскиот кор и претставници на нашата дијаспора во Словачка. Уводна протоколарна реч одржа амбасадорката на Република Северна Македонија во Словачка – Н. Е. Евгенија Илиева, која срдечно ги поздрави присутните и потоа ја претстави модераторката Моника Наѓова, која понатаму го водеше настанот со дискутантите. Од нив најпрвин се обрати директорот на издавачката куќа „Стимул“ на Филозофскиот факултет при Универзитетот Коменски во Братислава, кој истакна дека како издавачка куќа отсекогаш им претставувало предизвик да објавуваат поретки филолошки учебници, кои се специфични и за технички прелом и за визуелна обработка. Го потенцираше задоволството од постигнатиот резултат, како и воодушевувањето од неговите досегашни посети на Северна Македонија, и му посака долг живот и бројни благодарни корисници на учебникот.

Првиот рецензент на учебникот од словачка страна проф. Павол Жиго истакна дека промовираниот учебник претставува заслужен чин во јазичната подготовка на славистите и на сите други заинтересирани за македонскиот јазик во Словачка. Станува збор за значаен придонес во зближувањето на духовните и јазичните феномени на двата словенски народи, кои ги поврзува и најстарото културно минато, кое датира уште од деветтиот век.

Според него, „конкретниот учебник ги исполнува строгите научни, стручни и дидактички критериуми на модерен универзитетски учебник и го сметам за голем удел во раширувањето на славистичките сознанија во рамките на универзитетското образование“.

Професорот Жиго од Институтот за словачки јазик „Људовит Штур“ при Словачката академија на науките во Братислава ја потенцираше и досегашната своја одлична соработка со македонските научници и изрази повторна благодарност до Македонската академија на науките и уметностите, која пред две години му го додели орденот „Блаже Конески“ за истакнат странски лингвист-истражувач.

Вториот словачки рецензент на учебникот, проф. Мартина Иванова од универзитетот во Прешов, го истакна фактот дека конкретниот учебник пополнува едно значајно бело место на мапата на словачко-македонските јазични врски со акцент на областа на јазичното образование и креирањето на образовни материјали. Наедно ја потенцира и убеденоста дека учебникот ќе добие цела редица верни корисници и во универзитетската средина и надвор од неа. Ги спомена, исто така, и досегашните свои посети во Северна Македонија кои ѝ останале во трајно сеќавање.

Како последен дискутант се обрати проф. Мирослав Дудок од Филозофскиот факултет при Универзитетот Коменски во Братислава, кој изјави дека објавувањето на учебникот е од исклучително значење за целата културна фела во Словачка, бидејќи на ваков учебник се чекаше во Република Словачка и повеќе од педесет години. Неговото отсуство досега го оневоможило подлабинското истражување на македонскиот јазик во неговата работна кариера, иако досега се потрудил да подготви и неколку книжевни преводи, а присуствувал и на бројни културни настани и симпозиуми во Северна Македонија.

Заклучно, сите четворица говорители го истакнаа нескриеното задоволство што конечно е објавен историски првиот учебник за изучување на македонскиот јазик во Словачка, кој ќе биде наменет првенствено за студентите на универзитетите во Словачка, кои ќе можат факултативно да го изучуваат македонскиот јазик.

Од името на авторите се обрати вон. проф. Звонко Танески, кој им изрази искрена благодарност на издавачот, на рецензентите, на спонзорите и на амбасадорката на Република Северна Македонија во Братислава за константната несебична помош и за отворената поддршка во реализацијата на македонистичките културни проекти во оваа средноевропска држава.

Во претстојниот период ќе следуваат и други промоции на учебникот на универзитетите во Словачка.