Сечењето на дрвјата кај Ветеринарната станица каде што треба да се гради кружен тек и ќе се постави споменикот на војводата Александар Турунџев, предизвика гнев и револт кај граѓаните, коишто бурно реагираа на сечењето на дрвјата и уништувањето на зеленилото.

-Не знам што да кажам. Пред неколку години, за време на мандатот на ексградоначалникот Владимир Талески, кога ВМРО-ДПМНЕ беше на власт се обидоа да ги сечат дрвјата и зеленилото за да градат кружен тек. По протестот на граѓаните работите прекинаа и беше речено дека ќе се направи ревизија на проектот. Но, ниту се направи ревизија, ниту ништо. Сега, кога ВМРО-ДПМНЕ е повторно на власт, се исече зеленилото и тоа со асистенција на полицијата. Не можам да ги разберам. Од една страна наводно се борат за зелена Битола и за озеленување на градот, а од друга страна продолжи истата песна и се исече зеленилото на оваа сообраќајница. Не знам зошто се определија на оваа раскрсница да прават кружен тек и да го поставуваат споменикот на Турунџев, кога во градот има толку многу други локации, реагираа жителите од овој дел на Битола.

Во врска со сечењето на дрвјата реагираа и од независната листа на „Поинаку“.

-Нашиот став останува ист како и пред шест години, ниту едно дрво, ниту пак зелена површина не смее да биде уништена на сметка на каков било проект. Итно ни е потребно зголемување на зелените површини, а не сечење или уништување на веќе постоечките, ни изјави претседателката на Советот на Битола, Габриела Илиевска во името на советничката група на „Поинаку“.

На сечењето на дрвјата жестоко реагираа од СДСМ.

-Секој поминат ден со ДПМНЕ на власт и Коњановски како градоначалник, е на штета на Битола и битолчани. Денес жртва на самоволието на Општината се дрвјата кај поранешната Ветеринарна станица. Коњановски, со полициска асистенција и заштита сечи дрвја! Од што се плашат градоначалникот и ДПМНЕ, од своите сограѓани? Ако се толку убедени дека ја прават вистинската работа, зошто масакрот на зеленилото го прават во раните утрински часови, со заштита на полициски службеници? Коњановски и ДПМНЕ се одлепени од реалноста во која се наоѓа Битола. Градот тони во долгови, а тие наместо да се зафатат со решавање на проблемите, на секој чекор демонстрираат сила и насилие. Рушат гаражи, рушат трафики, сечат дрвја и око не им трепнува за Битола и битолчани. Ова безумие што го практикува Коњановски не било ниту во времето на Владимир Талески. Сите негови нереализирани проекти, сега ги реализира Коњановски, со една рака негови слепи послушници. Кога и да ја добие довербата од битолчани, ДПМНЕ им враќа на граѓаните со грабеж, насилство, самоволие и хаос-се вели во реакцијата на СДСМ Битола.

Од Општината Битола велат дека со сечењето на дрвјата од страна на јавното претпријатие „Комуналец“ практично започнаа подготвителните активности за реализација на проектот за изградба на кружен тек на улица „Прилепска“ со улица „Баталјон Стив Наумов“.

Заради непречено спроведување на градежните работи, на просторот каде ќе биде изграден новиот кружен тек, неопходно беше отстранување на постоечките дрвја. Во следната фаза на просторот кај Ветеринарната станица, ќе продолжат со воспоставување на времен режим на сообраќај. Со завршувањето на проектот, ќе се промени и режимот на сообраќај во овој дел на градот од крстосница со сигнализација во крстосница со кружен тек, што е особено значајно како мерка за растоварување на сообраќајот, во функција на зголемена безбедност и намалување на аерозагадувањето преку намалено задржување на возилата во овој дел на градот-информираат од Општината Битола.

Инаку, изградбата на кружен тек на овој дел од Битола почна во 2015 година, во мандатот на ексградоначалникот Владимир Талески, но, по бурните реакции на граѓаните, Талески се откажа од неговата изградба и споменикот на Турунџев го смести во дворот на Општината.

Притоа тој тогаш изјави дека ќе се прави ревизија на проектот за да се избегне сечење на дрвјата и зеленилото.