ВМРО-ДПМНЕ и Беса бараат оставки од министерот Оливер Спасовски поради убиството на Вања
![](https://www.slobodenpecat.mk/wp-content/uploads/2023/11/ZZF_0464.jpg)
Опозициските партии ВМРО-ДПМНЕ и Беса вечерва со соопштенија побараа оставки од министерот за внатрешни работи Оливер Спасовски поради убиството на 14-годишната Вања Ѓорчевска, чие тело вечерва беше пронајдено во Скопје.
Од ВМРО-ДПМНЕ велат дека досега се воздржувале од изјави за да се дозволи простор за неоптоварена истрага.
„На огромна жал овој случај има трагичен крај. Изразуваме длабоко сочувство до семејството и до сите роднини и пријатели на починатата. Но, она што мора да се нотира е еклатантната неспособност на министерот Спасовски кој се занимаваше со организирање самит наместо навремено да реагира. Тој е брука и срам за полицијата и не е во состојба да ги заштити граѓаните. Зошто молчи полицијата за случајот со исчезнатиот граѓанин на Велес? Како полицијата на Спасовски дозволи среде Скопје да хара криминална група и да киднапира и убива недолжни граѓани?“, се вели во соопштението од ВМРО-ДПМНЕ.
Од партијата додаваат дека во мандатот на Спасовски се случиле многу скандали.
„Спасовски оставка веднаш“, побараа од ВМРО-ДПМНЕ.
Од партијата Беса велат дека овој случај ја урна довербата на граѓаните во полицијата.
„Само што беше објавено дека 14-годишната Вања Ѓорчевска е пронајдена мртва. За трагедијата да биде уште поголема, пронајдено е и мртво тело на 74-годишен старец. Оваа катастрофа прерасна во трагедија и овој случај ја руши сета доверба на граѓаните во Министерството за внатрешни работи. Бараме итна оставка, барем од морални причини, како од министерот за внатрешни работи, Оливер Спасовски, така и од заменик министерот, Назим Буши. Се додека овие две личности го водат МВР, криминалците стануваат што поблиску до криминалот, а граѓаните се несигурни. Изразуваме сочувство до семејството и роднините на Вања“, соопшти Беса.