ДУИ наместо да почнат да делуваат како реална опозиција, тие се занимаваат со пишување писма, изјавуваат од ВМРО-ДПМНЕ откако најтесното претседателство на опозициската партија вчера имаше вонреден состанок на кој се одлучило в понеделник да се свика највисокото партиско тело. Причината за тоа е закажаната седница на Уставен суд на 11 декември за Законот за употреба на јазиците. Од ДУИ сметаат дека владата се обидува да ја дестабилизира земјата, а од ВМРО-ДПМНЕ возвратија со соопштение попладнево.

Во ДУИ треба да сфатат дека пишувањето писма со жалопојќи до меѓународните претставници нема да ги направи Европјеци. Кога станува збор за ДУИ едно е јасно тие се креатори на криминалот во Македонија, а СДС се кумови. ДУИ да престане да ги злоупотребува Албанците во Македонија за да се спаси од криминалните активности. Од криминал никој нема да се спаси. Помина времето на практикување криминал како што беше во времето на СДС и ДУИ. Сега за сторен криминал се одговара пред надлежни институции, пишува во партиското соопштение на ВМРО-ДПМНЕ.

Инаку ДУИ испратиле писмо до ЕУ, САД и НАТО во кое бараат поддршка и рекција за седницата на Уставниот суд на кој ќе се разгледува законот за јазиците.

-Ги повикуваме САД, ЕУ, НАТО и сите гарантори на Охридскиот договор да реагираат решително. Дипломатскиот ангажман со сите страни е од суштинско значење за да се спречи одлука што би го поткопала мирот, би ја дестабилизирала земјата и би го загрозила евроатлантскиот евроинтегративен процес на Северна Македонија. Стабилноста на Северна Македонија е столб на безбедноста на Западен Балкан, а нејзината кревкост може да има широки последици за целиот регион, пишува во писмото од ДУИ.

Вчера вечер, тесното Претседателство на Демократската унија за интеграција одржа состанок за да ја процени како што сметаат оттаму – загрижувачката ситуација предизвикана од закажаната седница на Уставниот суд на 11 декември, која има за цел да го укине Законот за употреба на јазиците и, преку тоа, како што смета ДУИ, „да го поништи Охридскиот рамковен договор и мирот што тој го воспостави“.

Тесното раководство оцени дека овие постапки се дел од оркестрирана кампања на нелегитимната влада и претставуваат сериозна закана за стабилноста на земјата и меѓуетничката хармонија. Во пресрет на оваа неприфатлива состојба, Тесното раководство одлучи да го свика највисокото партиско тело во понеделник, за да се донесат одлуки за натамошните чекори и да се дефинираат конкретни мерки за спречување на обидите на владата да ја дестабилизира земјата, стои во соопштението на ДУИ.

Оттаму уште еднаш ги повикуваате сите вклучени во овој план да ја прекинат оваа лудост, бидејќи последиците ќе бидат незамисливи.

ДУИ останува посветена на заштитата на Охридскиот рамковен договор и на сите достигнувања што ја гарантираат еднаквоста и мирот во Северна Македонија. Во овие клучни моменти, ги повикуваме сите граѓани и меѓународните фактори да останат обединети во одбраната на мирот и стабилноста, соопшти ДУИ