ВМРО-ДПМНЕ бара итна седница на комисијата за надзор на АНБ
Пратеникот Љупчо Пренџов од Пратеничката група на ВМРО-ДПМНЕ денеска јавно повика претседателот на Комисијата за надзор над работата на Агенцијата за национална безбедност (АНБ) и на Агенцијата за разузнавање (АР), Скендер Реџепи од ДУИ, да закаже итна седница поради загрижувачки сомнежи за незаконско постапување во АНБ.
Препорачано
— Целта е на седницата да се разгледаат загрижувачките сомнежи за незаконско постапување во АНБ, односно, да утврдиме точен датум за официјална посета во Агенцијата за национална безбедност преку која ќе извршиме директен увид во состојбите и темелно испитување на сите околности поврзани со овие настани — изјави Пренџов.
Според него, случувањата во јавноста веќе предизвикуваат вознемиреност и ја поткопуваат довербата во институциите задолжени за национална безбедност.
— Токму затоа, обврска на Комисијата е да делува одговорно и транспарентно, со цел, да се обезбеди отчетност на институциите и заштита на нивниот интегритет и демократијата во државата.
Граѓаните имаат право да знаат дали и како се злоупотребувале институциите и какви мерки ќе се преземат за да не се повтори тоа никогаш — нагласи Пренџов.
Тој додаде дека пратениците од ВМРО-ДПМНЕ ќе останат доследни на посветеноста кон вистината, владеењето на правото и на заштитата на интересите на граѓаните.
