Во присуство на голем број македонски Бугари и положување заклетва на новите партиски членови над библија, кама и револвер, ВМРО-БНД која што до неодамна ја предводеше Красимир Каракачанов, ја почна кампањата за парламентарните избори на местото на кое што загинал Тодор Александров на Пирин планина.

Тројцата копретседатели на партијата, како што објави БГНЕС, во обраќањата не ја изоставија Македонија. Европратеникот Ангел Џамбаски порача дека Бугарија е на Бугарите, а не на туѓи сили и на секакви агенти.

„Да живее единствената и неделлива бугарска нација. Да живее Македонија! Бугарија над се’“, изјави Џамбаски.

Вториот копретседател на ВМРО-БНД, Александар Сиди, пак, го обвини поранешниот премиер Бојко Борисов дека за една ноќ си ја сменил позицијата и извршил предавство со прифаќањето на „францускиот предлог“.

И третиот копретседател Искрен Веселинов не ја испушти Македонија, порачувајќи дека почнуваат поход за враќање на вистината во политиката.

„Во моментов Македонија не е бугарска и интересот на Бугарите не е заштитен“, изјави Веселинов.