На денешната седница на Светиот архиерејски собор на Српската православна црква (СПЦ) во Белград, се разгледува прашањето за тоа што ќе се случи со Православната Охридска Архиепископија (ПОА) која беше формирана во рамките на Српската црква, а тема на разговор е и косовското прашање.

ПОА беше формирана од страна на владиката на МПЦ-ОА Јован (Зоран) Вранишковски, кој го презеде водството над новоформираната црква во земјава, која, за разлика од МПЦ, беше признаена како канонска од Вселенската патријаршија и од сите православни цркви. Ваквата состојба, со две православни цркви во Македонија, опстојуваше две децении, а во меѓувреме Вранишковски беше уапсен и осуден за предизвикување верска омраза и нетрпеливост и за проневера на црковни пари на МПЦ, по што одлежа неколку години во затвор.

На минатиот Собор на СПЦ, лани, беше одлучено Македонската православна црква – Охридска архиепископија (МПЦ) да добие томос за автокефалност, со што ќе се надмине спорот што настанал уште во 1967 година, кога таа според СПЦ неканонски се одделила од Српската црква и од автономна, се самопрогласила за автокефална.

„Бидејќи Соборот е одговорен за најважните одлуки, можно е да соопшти што се случува со Православната Охридска Архиепископија (ПОА) формирана како автономна во рамките на Српската црква, што беше одговор на долгогодишното одбивање на МПЦ да се врати во таков статус“, пишува српската агенција Бета.

Во пресрет на седницата на Соборот, како што дознава агенцијата, во Белград престојувала делегација на МПЦ, која се сретнала со српскиот патријарх Порфириј. Околу ПОА, опцијата која претходно се споменуваше е таа да се интегрира во МПЦ, а владиците кои служеа во црквата да добијат епископски места во некои епархии на МПЦ-ОА. Во краткото соопштение на СПЦ за Соборот не се споменуваат никакви теми, освен доставување извештаи од епархиите и црковните органи, но Косово е редовна тема и се очекува така да биде и на овој Собор, кој според практиката заседава зад затворени врати.