Владата не успеала да се договори со „Рајанер“ за влез на нашиот пазар, поради невозможни барања на компанијата, вели министерот за транспорт, Александар Николоски.

Тој објасни дека со претставници на ирската нискобуџетна авиокомпанија имале неколку средби.

„Причината зошто не се на нашиот пазар се условите што ги поставија. Во пракса, тие сакаат аеродромите во Скопје и во Охрид да бидат опслужувани исклучиво од ‘Рајанер’, што би значело дека државата би трошела огромни суми пари само за нив. Тие исто така бараат времето помеѓу слетувањето и полетувањето да трае максимум 35 минути. Ова би нè натерало да вработиме неколку стотици дополнителни работници на аеродромите само за да ги задоволиме нивните потреби“, изјави Николоски за порталот „Екс-ју авиејшн“ (Ex-Yu Aviation).

Според информациите, „Рајанер“ побарал повеќе од двојно повеќе од постојните субвенции, што Македонија вообичаено им ги дава на авиокомпаниите.

„Во моментов, ние ги субвенционираме авиокомпаниите на аеродромот во Скопјe со девет евра по патник, а на аеродромот во Охрид со дванаесет. ‘Рајанер’ бара дваесет евра по патник во Скопјe, а 25 во Охрид. Со такви услови, соработката не е можна. Државата веќе издвојува значителни средства за субвенции, а посебните услови за ‘Рајанер’ би го нарушиле пазарот. Не можете да ѝ дадете на една компанија привилегии што другите ги немаат. А ако такви услови им се дадат на сите, државата би банкротирала“, предупредува Николоски.