Владата ги демантира тврдењата на СДСМ и Левица за наводна незаконска набавка на опрема за симултан превод и аудио и видео поддршка на настани. Во соопштение од владината прес-служба се наведува дека станува збор за „конструктивни лаги и инсинуации“ и обид за манипулација на граѓаните.

– Се работи за јавна набавка која со години наназад се спроведува, а денес се реализира во согласност со законските процедури и принципите на транспарентност. Договорот е склучен за период од две години и исплатата ќе се врши исклучиво врз основа на реализација, а не однапред фиксирана сума – посочуваат од Владата.

Во реакцијата се додава дека во 2023 година Владата предводена од СДСМ и ДУИ склучила договор во вредност од 30 милиони денари без ДДВ, без рамковна спогодба, со што буџетската обврска била однапред преземена.

– Јавноста треба да знае дека денес транспарентноста и отчетноста се единственото начело на работа на Владата. Нема повеќе тајни зделки и договори ‘во четири очи’. Нашата обврска е пред граѓаните – чесна, транспарентна и одговорна власт која не се крие зад манипулации, туку нуди решенија – се вели во реакцијата.