Претседателот на Владата, Христијан Мицкоски денеска заедно со министерот за спорт, Борко Ристовски ги примија македонските ракометни репрезентативци кои настапија на Светското првенство во ракомет што се одржа во Хрватска.

Нашите репрезентативци годинава на Мундијалот покажаа одлични игри освојувајќи го 15 место.

За таа цел Владата донесе одлука да додели премија на ракометарите во висина од три милиони денари, како резултат на достоинственото претставување и пожртвуваноста на македонските спортисти во Хрватска.

– Во име на Владата и во мое лично име, сакам од срце да им честитам на нашите ракометари за одличниот настап и за гордоста што ни ја донесоа со своите храбри игри во Хрватска! Вие повторно покажавте дека со борбен дух, посветеност и заедништво можеме да ги поместиме границите на можностите и да ја претставиме Македонија во најдобро светло.

Секој ваш натпревар беше доказ за силата на македонскиот спортски дух. Борбата на теренот, срцето што го оставивте за нашиот дрес и поддршката што ја добивте од македонските навивачи се вистински пример за тоа што значи љубов кон татковината – стои во објавата на Мицкоски на Фејсбук.

Во знак на благодарност претседателот на Ракометната федерација на Македонија, Александар Стефанов, заедно со селекторот Кирил Лазаров и капитенот на репрезентација Филип Кузмановски на претседателот на владата и министерот за спорт им подарија дресови.