Инвентивната Стефанија Несторовска, која стои зад инстаграм-профилот и блогот snestorovska.com, денеска ни носи рецепт за круши, но приготвени во едно поинакво кулинарско руво.

Здрав десерт што се подготвува брзо и лесно. Крушите го подобруваат варењето, богати се со антиоксиданти, а заедно со екстрактот од ванила му даваат одличен и богат вкус на овој деликатес.

Меѓу другото, ова е одличен десерт и за оние што избегнуваат глутен во својата исхрана.

Состојки:
За крушите:

– 4 круши
– 1 лажица кокосово масло, стопено
– 1/2 лажичка ванила

За фил:

– 140 г (1 шолја) индиски ореви, киснети во вода 1 час или повеќе
– 120 мл (1/2 шолја) млеко од јаткасти плодови или вода
– 2 лажици агаве или друг течен засладувач
– 1/2 лажичка ванила

За прелив:

– гранула или ситно исечкани јаткасти плодови

Подготовка:

Рерната се загрева на 200 степени.

Убаво се мијат крушките и се сечат на две вертикални половинки. Се вадат семките и се прави мала дупка во секоја половинка. Остатоците што ќе останат, може да се искористат за нешто друго, на пример, за смути.

Се додаваат крушките во тава за печење. Јас користев керамички сад, но може каква било тава за печење.

Во мал сад се додаваат кокосовото масло и ванилата. Се промешува и оваа смеса со четка за мачкање или со рака се додава на крушките. Убаво се премачкуваат сите еднакво. Се печат 20-30 минути односно готови се кога ќе омекнат и ќе добијат убави карамелизирани крајчиња.

Во меѓувреме се подготвува филот. Се премиваат индиските ореви со ладна, чиста
вода и се додаваат во блендер заедно со другите состојки за филот. Се блендира додека не се добие кремаста смеса. Оваа смеса се остава во фрижидер додека се печат крушките.

Испечените круши се оставаат малку да се изладат пред да се додаде филот од ванила.

Се додава и преливот одозгора – и тоа е тоа. Може да ги чувате во затворен сад, на собна температура два дена или во ладилник три-четири дена.