Самостојна изложба на Мице Јанкуловски со наслов „Црно и црно“ од 2 ноември оваа година до 6 јануари 2025 година ќе биде поставена во галеријата „Фебо и Дафне“ во Торино, Италија.

Изложбата беше отворена на 2 ноември како придружен настан на саемот за современа уметност „Артисима 2024“ во Торино, во организација на ТАГ (Торино арт-галерии) во рамките на Ноќ на современата уметност.

Куратор на изложбата е д-р Мелани Зеферино, директор на Музејот за текстил во Кјери и вонреден професор на Академијата за ликовна уметност „Албертина“ во Торино.

– Креативното дело на Мице Јанкуловски опфаќа различни медиуми и ја отсликува неговата визија за светот, кој постојано се менува и во кој мноштво работи се движат низ времето и просторот, се преклопуваат на рамнина што се протега бесконечно далеку. Преку контемплација, медитација и креативност, тој го воочува, а потоа и го обликува универзалниот поредок кој опфаќа различност и постојана трансформација. Зад прикажаната идеална претстава на животот на формите се крие опсервацијата на уметникот како клуч за интерпретацијата на неговата филозофија: секое дело има своја историја и се отвора кон мноштво нови димензии – напиша кураторот д-р Мелани Зеферино.

(Текстот е објавен во „Културен печат“ број 255, во печатеното издание на весникот „Слободен печат“ на 9-10.11.2024)