Навивачите на ривалите веќе се шегуваат, а трпението на приврзаниците на Ливерпул почнува да се троши. Од најскапиот играч на средниот ред во историјата на Премиерлигата, Германецот Флоријан Вирц, се очекуваше многу повеќе – а засега добија само прекар „Агент 007“ (нула голови, нула асистенции во седум натпревари).

По дебито во Комјунити шилд со асистенција против Кристал Палас, неговиот ефект запре. Во Премиерлигата по шест кола сè уште нема конкретен учинок, а не се истакна ниту во победата над Атлетико Мадрид во Лигата на шампионите. Дополнително, во првиот сезонски пораз токму против Палас промаши зицер од пет метри.

Меѓу критичарите е и Вејн Руни, кој смета дека проблемот не е во самиот квалитет на Вирц, туку во тоа што не се вклопува во системот на Ливерпул.

„Има многу квалитет, но ако ме прашате мене – едноставно не гледам каде би можел да игра. За мене не е прашање на цена или способност, туку на тоа што ја нарушува рамнотежата и начинот на кој игра Ливерпул. Тој е повеќе офанзивен играч, а не класичен трет играч во средниот ред“, изјави Руни.

Проблемот за менаџерот Арне Слот е што летово остана без Луис Дијаз и не доби природна замена, додека во офанзивниот дел на средниот ред веќе има гужва со Доминик Собослај кој ја покриваше истата позиција минатата сезона.

„Тешко му е, нема сомнеж. Ќе бара во себе начин како да се адаптира и подобри. Играл солидно, но кога ќе донесете толку многу напаѓачи и веќе го имате Салах, конкуренцијата станува преголема. А мислам дека Вирц најмногу страда поради тоа“, додаде Руни.

Иако стартот е тежок, легендата на Јунајтед сепак е убедена дека Германецот ќе проработи:

„Тој е врвен играч, сигурен сум дека ќе биде подобар. Но засега, неговото место во тимот едноставно не е јасно.“