На Стево Талески од Крушево животот му се менува за 360 степени во 2015 година. Од активен човек кој работел во градежништвото, одеднаш станува лице со попреченост. Причината зошто е во оваа состојба и до ден денес не му е јасна.

– Денот беше „петок 13“ 2015 година, почувствував голема болка во задниот дел, на грбот. Веднаш појдов на болница, болката ми ја смирија со лекови, но по неколку часови повторно се врати.

Тогаш почувствував како веднаш ми се одзема десната нога.

Отидовме во болницата во Прилеп, таму помислија дека е мозочен удар и ме препратија во Скопје. По многу испитувања констатираа дијагноза – акутен трансверзален миелитис – рече за „Слободен печат“  Талески.

Една година патувал редовно за Скопје на физикална терапија, но од пандемијата наваму е препуштен самиот на себе. Состојбата не му се менува ни на подобро и како што вели самиот тој, ја прифатил ситуацијата дека ќе живее вака.

Талески финансиски се одржува со социјална помош од само 15.000 денари, дополнително и неговата сопруга е во лоша здравствена состојба и е невработена.

-Кога почна короната тогаш кај мене се разбуди желбата да изработувам ракотворби со религиозни мотиви. Идејата ми беше да ја пополнам досадата, но и да пробам да заработам нешто на тој начин.

Кај езерото во Крушево се правеше патот, кога ги видов камчињата ми дојде идеја дека може да се направи нешто убаво, така почнав. Едно по едно се наполни визбата.

Јас ги продавам овие изработки, не ми е тешко да ги направам тешко ми е да ги доставам, потребно ми е адаптирано возило кое ќе ми ја олесни работата – вели тој.

Срам, непријатност, осетливост тоа се чувствата кои ги има Талески бидејќи не се откажува, сака да живее и да работи самостојно. Во нашата редакција го донесе неговиот добар пријател и сосед, но Талески вели дека не може постојано да моли некого за помош, нагласува дека е желен за работа и дека сака да си ја проба среќата со продажба на иконите низ Македонија, па и надвор од границите, но без приспособено превозно средство му се врзани рацете и тој нема шанса да ги пласира своите изработки на пазарот.

Талески нема финансиска моќ за да си го купи адаптираното возило, не бара милостина, туку помош од добрите луѓе да се соберат средства со цел да го купи ова возило и да продолжи да работи и да ја шири својата креативна магија во сечиј христијански дом.

Купете икона од Талески преку неговиот фејсбук-профил.