Напредокот во технологиите како вештачката интелигенција, 3Д-печатењето и виртуелната реалност значително започна да ги менуваат сите области на науката и медицината. Овие иновации овозможуваат нови и поефикасни начини во медицината кои ја подобруваат точноста, брзината и безбедноста на операциите. Традиционалните методи на работа и понатаму се важни, но сепак, новите технологии го менуваат и го кратат процесот на подготовка за оперирање во тек на операција и пократко закрепнување на пациентот.

Во утринската емисија „Слободен печат“ разговаравме со доктор Стефан Арсенков, специјалист по абдоминална хирургија на Универзитетската клиника „Св. Наум Охридски“ и коосновач на компанијата „3DLoom“, која е специјализирана за комбинирање на нови технологии како што се вештачка интелигенција, 3Д-печатење и виртуелна реалност. Тој заедно со медицинскиот тим под водство на д-р Васил Папестиев во Универзитетската клиника „Државна кардиохирургија“ во Скопје, успешно ја изврши операцијата на отворено срце.

Арсенков е млад хирург кој ја употреби оваа можност да ја примени виртуелната реалност и 3Д-печатењето во различни области на хирургијата. Со тоа им овозможи на колегите еден иновативен, прецизен начин за подобрување на хируршките резултати при оперирање.

Тој и неговиот тим, на почеток, не очекуваа дека овој метод на 3Д-печатење на органите ќе биде толку успешен и прецизен.

-Проблемите кои пробувавме да ги решиме не се проблеми коишто лесно може да ги најде човек на Гугл, да пише: „Како да го испринтам срцево за да ми излезе добро аортата?“, туку треба да откриеме сами –  објаснува Арсенков за „Слободен печат“.

Ова укажува дека новите иновации ги „рушат“ старите методи во науката и медицината во Македонија кои помогаат при секоја подготовка на предоперативен зафат. Арсенков ни објаснува како тие реплики на органите им помагаат на хирурзите за подготовка на операција.

-Се занимаваме со креирање на овие 3Д-модели за предоперативна подготовка, коишто се, во суштина, идеална реплика на органите на пациентот со која подобро се запознаваме со индивидуалната анатомија на секој од пациентите и можеме да бидеме многу попрецизни, поефикасни и побезбедни при извршување на операциите.

За „Слободен печат“ Арсенков ни објаснува дека на почеток, неговите колеги биле многу скептични за практикување на овој процес во медицината, особено во Македонија.

-Можеби на моменти почувствував дека има некои, ајде да речам, погледи на сомнеж, како „што е сега ова и што измисли сега, нови играчки на Стефан, со што се занимава!?“ – ги опишува Стефан реакциите на неговите колеги.

За Арсенков ова е мотивирачки момент кој  го натерал да им го покаже спротивното и да докаже дека Македонија има потенцијал за иновативност и напредок во областа на медицината.