Во нашата земја во посета е Роџер Хартман како говорник на втората Конференција за управување со ризици организирана од Хајделберг факултетот во Скопје, во соработка со Академијата за банкарство и информатичка технологија и Институтот за бизнис и менаџмент Хајделберг Скопје. Хартман има исклучителна биографија. Тој е претседател на Европската асоцијација за финансии и планирање. Има богата банкарска кариера, а предавал на разни универзитети во светот.

Во разговор за утринската програма „Слободен печат“, тој порача дека нашите сограѓани не треба да бидат загрижени ако идната влада позајми една милијарда евра од некоја европска земја затоа што така се обезбедуваат пари за инвестиции што ја зацврстуваат нашата позиција на патот кон ЕУ. Во однос на каматните стапки, тој смета дека е добро што Европската централна банка ја намали стапката на депозитите, а за глобалните случувања смета дека треба да бидеме особено внимателни, иако нè очекува потрес во финансискиот свет како во 2007 година.

– Кога стигнав на аеродромот во Скопје, можев да видам дека многу се гради, насекаде се гради. Видов активности, а за сето тоа требаат инвестиции, односно треба внес на пари, така што јас не бев шокиран од информацијата дека ќе позајмувате една милијарда евра. Немам претстава од која земја ќе се зајми, но владата во Македонија мора да обезбеди независност во целиот тој процес, без да има некакви „дилови“. Што се однесува до каматните стапки, тие сега одат надолу, така што тоа позајмување не ме загрижува. Македонија е кандидат за членка во ЕУ и јас сум многу радосен за тоа и многу сакам да ве видам во европската фамилија. Не би било логично ако сакате да позајмите пари од Азија, но ако е од европска земја, тоа само го поддржува процесот во евроинтеграцијата – рече Хартман.

Вчера стигна веста што сите ја очекуваа. ЕЦБ ги намали стапките за 25 базни поени, со што стапката на депозити се спушти на 3,75 проценти.

– Првиот сигнал стигна во март кога Швајцарската национална банка ги симна каматите удолу што беше сигнал и другите да го направат тоа. Сега е одлично време за тоа, иако инфлацијата е сè уште тука. Мора да бидеме внимателни. Ова е нешто позитивно што се случи затоа што ќе даде малку воздух на економскиот сектор. Во Америка ситуацијата е различна и се очекува намалување на стапките можеби на крајот на годината – вели Хартман.

Како претседател на Европската асоцијација за финансии и планирање чие седиште е во Луксембург, тој вели дека е многу горд на тамошните инвестициските фондови затоа што Луксембург е втората земја во светот по инвестициски фондови, по САД.

– Ако купувате инвестициски фонд во Хонгконг, или Сингапур, шансите тоа да е фонд од Луксембург се 80 проценти – вели Хартман.

Тој објаснува дека инвестициските фондови може да играат многу значајна улога во земјите во развој.

– Големо е знаењето на присутноста на инвестициските фондови во земјите во развој. Еве ќе го споменам примерот со Виетнам. И во Македонија, особено во Западен Балкан, ќе донесе развој и ќе игра клучна улога. Ништо не може да се случи преку ноќ. Не може да ги видите промените за три месеци, но тоа што го гледам за Македонија е многу светла иднина – вели Хартман.

Во однос на глобалните случувања, како што се Руско-украинскиот конфликт, војната на Блискиот Исток, влијанието на кинеската економија, Хартман порачува внимателно да се набљудува состојбата и внимателно да се прават чекорите.

– Иднината е тешко предвидлива, но важно е да се остане оптимист. Финансиските пазари од Америка до Азија се преценети и мора да има некаква корекција. Не кажувам дека ова е состојба како во 2008 година, состојбата не е така комплицирана, но мора да се внимава – порачува Хартман.