Нашата таеквондиска Милијана Рељиќ, по успешното претставување на Олимписките игри успеа да собере поени кои ја качија неколку скалила погоре на Светската таеквондо ранг-листа, таа сега е на четвртата позиција. Актуелната европска клупска шампионка можеби не ни донесе медал од Летните олимписки игри во Париз, но оттаму замина со гордо крената глава, бидејќи успеа да ја совлада двократната олимписка шампионка Џејд Џонс.

Рељиќ за првпат пред камерата на „Слободен печат“ откри дека е вљубена, низ овој разговор дознаваме дека сака да излегува во Дебар Маало и дека омилено забрането јадење ѝ е пицата.

За нејзиниот настап на Игрите таа ни откри дека успеала да ја задржи менталната дисциплина на највисоко ниво.

– Ние бевме подготвени, бидејќи откако ги направиме ждрепките кои се прават во однос на ранг-листата, излезе дека мене ми се падна да се натпреварувам со Џонс. Кога стапнав на татамите бев многу смирена, фокусирана и немав воопшто трема. И покрај тој психички притисок дека таа е двократна олимписка шампионка, светска шампионка, а овде ќе додадам и дека беше најголем фаворит за освојување на златото на Олимпијадата, мене тоа не ми влијаеше и успеав да ја победам – вели Рељиќ.

Најголемата поддршка на Мила се нејзините родители.

– Татко ми секогаш ми го кажува тоа што сакам да го слушнам, со неговите совети тој секогаш ми е огромна мотивација. Моите ми се дефинитивно најголемата поддршка – додава таа.

Во нејзината категорија, жени до 57 килограми, злато зеде Корејката, а сребро Иранката. Рељиќ и претходно била на татамите со Иранката.

– Иранката ја познавам, сме се бореле и тогаш ја победив. Со Корејката не сум се борела досега, јас работам во категорија до 62 килограми, ова ми е втор турнир да работам во оваа група, а тоа е така бидејќи олимписка категорија е до 57 кг. Со поголемиот дел од девојките се сретнав за првпат, тоа беше за мене дополнително предизвик за да видам дали ќе можам да се носам со нив, бидејќи тие користат поинакви техники. На Олимписките игри бевме околу 16 најдобри таеквондистки во светот, сум се борела само со три со нив – рече таа.

Мила во Париз поминала убаво време, се дружела со спортистите од целиот свет и за неа тоа било едно убаво искуство и доживување. Го видела легендарниот Новак Ѓоковиќ, а како најинтересна ја издвојува средбата со Серена Вилијамс, која ѝ оставила многу убав впечаток.

Од нејзината комуникација со таеквондистките од другите земји, Рељиќ заклучува дека ниту една не се соочува со проблемот „услови за вежбање“, што за нашата натпреварувачка беше сериозен, ако не и клучен фактор кој влијаеше на нејзиниот резултат. Таа како пример ја посочува соседна Србија и нивната натпреварувачка која освои сребрен медал на Олимпијадата. За Александра Перишиќ, вели нашата соговорничка, сигурно условите за подготовка не претставувале пречка.

– Голем проблем се финансиите, но исто така во Македонија јас немам со кого да правам спаринзи, да имам тренинзи со девојки на мој ранг или подобри. Затоа што на тој начин се подобруваш. Од таа причина често одам надвор на тренинг-кампови. Доколку имам поголема финансиска поддршка, тогаш почесто би ги посетувала овие кампови. Пред Олимпијадата сите најдобри во мојата категорија беа на 20-дневен тренинг-камп во Јордан, а јас не отидов затоа што за нас тоа беше прескапо – вели Рељиќ.

 

Мила моментално е на одмор во Белград кај нејзиниот брат, но за кратко повторно се враќа во салата бидејќи ќе започнат нејзините подготовки со цел за првпат да настапи на Гран при турнирите кои ја очекуваат.

Целиот разговор со Мила Рељиќ погледнете го во продолжение: