Отворањето кафе-бар во време на пандемија беше само еден од предизвиците со кои се соочи Мирче Чашуле. Активен во новинарството и во дигиталниот маркетинг, со искуство во култните скопски барови, кафето беше само една од работите што му беа далеку од центарот на неговиот интерес.

И покрај тоа што не беше експерт во областа, неговиот фокус беше создавање квалитетна услуга и уникатно искуство за сите што ќе го посетат неговиот сега многу познат кафе-бар „Dude Specialty Coffee“

– Предходно не сум се занимавал со сопствен бизнис, секогаш сум работел за друг, и целата работа околу водење на локал, и менаџирање со вработените,
менаџирање со производите, си ги учев со текот на самата работа – вели Чашуле.

Името „Dude Specialty Coffee“ произлегува од познатиот филм „Големиот Лебовски“, каде што главниот лик го глуми Џеф Бриџис – „The Dudе“ .

Целиот тој процес е со цел да создаде една заедница на љубители на доброто кафе. А за тоа му требало приспособување, учење.

– Иако не започнав со длабоко познавање, беше јасно дека ако сакам да успеам, морам да се вложам во учење и да создадам нешто што ќе биде повеќе од само кафе. Беше важно да се изградат односи со клиентите и да се создаде простор во кој луѓето ќе се чувствуваат како дома – објаснува Чашуле.

Секој бизнис си носи предизвици и нови задолженија. Еден од најголемите предизвици бил сомнежот на луѓето околу него за отворање таков вид кафе-бар.

– Многумина не веруваа дека тоа ќе биде успешен потфат. Сите нè гледаа со скептицизам кога зборувавме дека ќе отвораме во 7:30 сабајле, дека затвораме во 6, како тоа ќе функционирате прва смена… Јас ви кажувам, тоа е убавината – вели Мирче.

Сега, по неколку години работа, „The Dude“ доби престижно признание на Мадридскиот кофи фестивал, каде што се најде на листата „The World’s 100 Best Coffee Shops“.

Го затвораме интервјуто со една јасна порака што треба да ја прифати секој што можеби се двоуми да започне нешто ново.

– Секогаш е тешко да започнеш нешто ново, но ако имаш визија и верба во она што го правиш, успесите ќе дојдат. Важно е да веруваш во себеси и да не се плашиш да го следиш својот пат – заклучува Чашуле.