Мојата визијата е да имаме квалитетен, урбан живот, да имаме рамномерен развој и економски и урбан, да размислуваме за енергетска ефикасност што повеќе, домовите да бидат потопли, да бидат со помали економски трошоци. Да имаме безбедна, чиста и одржлива општина, вели Мирослав Лабудовиќ, кандидат за градоначалник на Општина Центар, предложен од ЗНАМ.

Лабудовиќ во моментов е заменик-министер за енергетика, рударство и минерални суровини, а во интервјуто за „Слободен печат“ потврди дека зад неговата кандидатура покрај сопартијците од движењето ЗНАМ, ќе застанат и од владејачката ВМРО-ДПМНЕ, коалициски партнер во Владата.

– Јас сум кандидат на движењето ЗНАМ – За наша Македонија, со полна поддршка од ВМРО-ДПМНЕ. Таков договор направивме партнерски, таму каде што ВМРО-ДПМНЕ има свои кандидати во општините, движењето ЗНАМ да ги поддржи, а таму каде што ЗНАМ има свои кандидати, ВМРО-ДПМНЕ да даде потполна поддршка. Центар е една од општините во кои ДПМНЕ нема свој кандидат. Досега е договорено за две општини, Куманово и Центар, и тука мислам дека ќе завршиме со наши кандидати, меѓутоа ќе им дадеме потполна поддршка на кандидатите на ВМРО-ДПМНЕ. Сакам да истакнам дека во повеќе од 50 општини во Македонија и во градот Скопје, движењето ЗНАМ има сопствена советничка листа – вели тој.
Лабудовиќ е дециден дека во кампањата, која патем сè уште официјално не е почната, нема да дава нереални ветувања.

– Сите ние што живееме во Центар се соочуваме со истите проблеми, истите работи нè фрустрираат и верувам дека сите знаеме како тоа треба да го направиме заеднички. Затоа е тука општината, како некој ветар во грб, за да ги реализираме сите тие активности што сме ги напишале, што сме ги договориле и што се реално изводливи. Во нашата кампања нема да ветиме ништо што не е реално изводливо, не сакам никој да нè држи за збор дека не сме го исполниле тоа што сме го ветиле – изјави Лабудовиќ.

За проблемот со загадувањето, Лабудовиќ е свесен дека градоначалник на една општина не може многу да стори, бидејќи проблемот е глобален, а решението ќе мора да се бара во договор со другите градоначалници од Скопје. Сепак, тој е уверен дека е кадарен да го исчисти ѓубрето и сметот од Центар.

– Пред сè, да почнеме од тоа да ја исчистиме темелнo општината, да направиме пресек и да почнеме да го одржуваме тоа, бидејќи Општина Центар е сериозно валкана, хигиената е на многу ниско ниво – тврди Лабудовиќ, кој додава дека планира од отпадот да произведува енергија по примерот на други урбани центри во Европа.

За урбаната мафија и за прекумерните градежни активности во Општина Центар, тој вели дека може успешно да се избори со проблемот во соработка со преостанатите надлежни институции во Македонија.

– Мора да се обезбеди контрола на градежниот сектор, да не биде вака агресивна изградбата што се случува сега со не знам колку многу градежни локации што ги имаме и за кои лично сметам дека голем дел од нив се небезбедни. На пример, кога ќе отидете во странство, не можете да видите дека зградата се гради. Целосно е заштитена, има соодветни мрежи што го намалуваат ширењето прашина – додава Лабудовиќ.

За хаосот во сообраќајот, кој е голем проблем во Општина Центар, тој смета дека решението повторно мора да се пронајде во соработка со Градот и со другите општини, а голема надеж тој има во најавената изградба на железничка инфраструктура во делови на Скопје.