Кое е вашето омилено животно од Зоолошката градина – Скопје? Дали знаете како се вика, колку години има, од која земја потекнува и кога за првпат бил донесен тој вид, таа единка кај нас? Нашата Зоолошка постои од 1926 година и низ годините се развивала просторно, а растел и бројот на животните. Денес при посетата на Зоолошката градина можете да се запознаете со стотици разновидни единки, а секоја од нив крие посебна судбина.
„Слободен печат“, низ овој серијал, кој го нарековме „Лична карта на жителите на ЗОО+ Скопје“, ќе се обиде да ви ги доближи нивните приказни, нивните карактери и чувства. Ќе се обидеме да ви овозможиме да дознаете што јадат и која е нивната омилена храна, ќе дознаете нешто ново и забавно, поврзано со омилените сожители во главниот град.

Најљубопитните животни во скопската Зоолошка градина се лемурите. Првиот лемур кај нас е донесен пред 13 години, денес имаме околу 50 лемури, од нив 15 се женки, највозрасниот има 16 години, а на огромна радост за сите и оваа година имаме принова, односно шест се бебиња.

За нив се грижи ведрата зоо-негувателка Александра Спасовска.

– Лемурите се од тропските шуми од Мадагаскар, карактерситично кај овие животни е тоа што женката доминира, односно кај нив владее матријархатот. Лемурите се најљубопитните мајмуни, сакаат сè да проверат, да допрат – вели Спасовска за „Слободен печат“.

Кога женките лемури се во блажена состојба се многу нервозни, објаснува нашата соговорничка, и поради таа причина ги одвојуваат во друго живеалиште за да не настане некаква незгода.

– Бебињата лемурчиња до четири месеци не можат самостојно да одат и затоа живеат на грбот на мајка им, но многу брзо растат. Инаку кога ќе се родат се многу малечки, околу пет сантиметри, а со многу долг опаш, навистина се многу слатки и интересни – рече Спасовска.

Александра, Спајки, Старк, Ава, се дел од имињата на постарите лемури, бебињата сè уште не добиле имиња, нашата соговорничка ја повикува јавноста да се вклучи во овој креативен момент и да учествуваат во давањето имиња на новите животни.

– Ние се радуваме кога граѓаните се вклучени во активностите на Зоолошката, секако дека може да даваат предлози за имиња на младенчињата, но посебно сакам да апелирам до сите фирми или поединци да донираат реквизити или што било, што би помогнало да ги подобриме условите на нашата Зоолошка, бидејќи ова е наш заеднички простор – појасни Спасовска.

Децата, додава таа, најмногу им се радуваат на лемурите и, како што вели, тоа е обострано кај сите животни.

– Не дека се мои, ама лемурите се најголема атракција за сите деца, секогаш ги бараат кога ќе дојдат во ЗОО и тажни се кога не се надвор. Но, јас сум забележала дека и лемурите посебно реагираат кога меѓу посетителите има деца, некако ми се чини како да имаат посебна енергија и има посебна врска помеѓу нив. Лемурите ја препознаваат невината љубов кај децата– рече Спасовска.

Целото видео погледнете го во продолжение: