Кугларницата „Мусандра“, која се наоѓа во сутеренот на Градскиот трговски центар во Скопје, беше отворена во октомври 1974 година, само неколку месеци по отворањето на самиот трговски центар. Изградена од реномираниот бренд „Шмид“, оваа кугларница беше меѓу најсовремените и најубавите објекти во поранешна Југославија, поставувајќи нови стандарди за кугларскиот спорт во регионот. Во 2020 година, кугларницата беше повторно реновирана, со нова опрема и технологија, подготвена за нови меѓународни натпревари. Со осум патеки и капацитет за повеќе од 300 гледачи, кугларницата „Мусандра“ денес е еден од најважните спортски објекти во Скопје.

Екипата на „Слободен печат“ разговараше со дел од вработените во кугларницата и тимот на Женскиот кугларски клуб Мусандра (ЖКК Мусандра), кои споделија свои лични искуства за овој спорт.

Мирјана Младеновска на куглање доаѓала за рекреација, но по нејзиното сериозно вклучување во натпреварите, кугларството ѝ станало страст.

– Мислев дека куглањето е само рекреација, а не сериозен спорт. Меѓутоа, не било така. Преоѓа во поголема љубов кога почнуваш да се натпреваруваш, да куглаш, да се стремиш кон многу поголеми резултати и е доста забавно – објаснува таа за „Слободен печат“.

Душко Ајдин, референтот на кугларницата „Мусандра“, ни рече дека доколку сакаме куглањето да биде популарно меѓу жените, мора да добие поголема поддршка и да не се гледа само како машки спорт.

– Жените имаат голем потенцијал да бидат успешни во овој спорт и јас сум уверен дека со повеќе поддршка и мотивација, ќе можеме да видиме повеќе жени на врвот – вели Ајдин.

Куглањето е спорт што се проширува и се развива, а разговорите со членовите на Женскиот кугларски клуб Мусандра го потврдуваат тоа.

Една од членките на кугларницата Соња Филиповска ни раскажува како се „заразила“ со овој спорт.

– Секој што не дошол и не пробал, не го чувствува како атрактивен спорт. Меѓутоа, дефинитивно треба да се дојде и да се проба – вели Филиповска.

Филиповска вели дека не секогаш е лесно да се биде жена во ваков спорт.

– Жените во овој спорт се во многу помал број за разлика од мажите – вели таа.