Година полна со новитети, премиери кои не дозволија салата на Македонскиот народен театар (МНТ) да остане празна. Летната сцена „Славиша Каевски“ собра 8.000 посетители и беше виситинско освежување на културната сцена, а идејата е, како што вели Никола Кимовски в.д. директор на МНТ, овој настан да прерасне во традиција.

– Летната сцена на платото пред реката Вардар, на нашата тераса немаше претходно функција во склоп на театарот, тоа го направивме од сопствени средства и успеавме да донесеме млади музички артисти, театрски претстави, и наши и гостувања од останатите театри во Р. Македонија, и можам да кажам дека сме многу задоволни во однос на посетеноста, бидејќи е сепак прв проект и изненадување и за самата публика која реагираше во голем број. Летна сцена „Славиша Каевски“ е направена во име на нашиот прерано починат колега и голем актер – рече за „Слободен печат“ Кимовски.

Кимовски е горд на успесите коишто театарот ги реализирал, а за тоа зборуваат и бројките на продадени билети.

– Статистиката вели дека за ланската сезона во целата година се продадени безмалку 50.000 билети, а од моето назначување, од месец јули досега се продадени 54.600 билети – вели Кимовски.

За нашиот соговорник беше тешко да издвои една претстава која ја одбележа годината во изминување, но публиката веќе си го кажа своето.

– Од позиција на директор неблагодарно е да издвојам една претстава. Но, доколку ја прашуваме публиката, можеби таа ќе каже претставата „12“, а тоа ни го потврдува и продажбата на билети. Морам да споделам со вас дека само кратко откако ги објавивме првите фотографии како најава, веднаш почнаа да ѕвонат телефоните и заинтересираните да прашуваат кога ќе има билети на продажба. За јавноста е веќе познато дека до пролет се распродадени сите билети за оваа претстава – рече тој.