Угинати над 15 ретки видови животни, птичји грип, затворање на 21 ден. На две години пред 100-годишнината на ЗОО Скопје, наместо да се подготвуваме за големиот јубилеј, ние се занимаваме со проблемите кои ги има Зоолошката градина. Околу состојбата во ЗОО, околу тоа што се случува зад затворените врати, има ли политика во целата состојба, одговори во утринската емисија „Слободен печат“ побаравме од ексдиректорот на Зоолошка – Скопје, Ѓорги Галетановски.

Според него, најпроблематично во моментов е затворањето на вратите на Зоолошката, бидејќи останува без приход.

– За состојбата со птичјиот грип дознав од медиумите. Отидов на лице место и посетителите веќе беа евакуирани. Внатре беа влезени инспектори. Се испостави дека се појавил птичји грип. Мислам дека затворањето на 21 ден е долг период за институција која е самофинансирачка од влезници. Веројатно сè е според правилник, но мислам дека немаше потреба од толкава паника – вели Галетановски.

На прашањето што се случува изминатите две години кога угинаа над 15 животни, Галетановски вели дека кај преживалските коњи обдукцијата покажала дека се отруени.

– Ова беше една голема катастрофа што не би посакал на никој да му се случи, ни во приватна зоолошка, ни во природа. Тоа е најголем чин на злосторство. Коњите беа брутално отруени. Тие беа една од најретките раси во светот. На Балканот имаше само кај нас – вели Галетановски. За другите животни вели дека се случувало и во негово време некое да угине од болест или старост. Но во овој момент прстот го вперува во раководството и во можноста да нема соодветна ветеринарна служба.

– Знам дека вработените се едни од најсовестните луѓе во државата. Се грижат за животните повеќе отколку за себе. Проблемот ќе го насочам кон моменталното роководство, можеби кон несоставување на соодветен ветеринарен тим – вели Галетановски.

Околу тоа дали би се вратил на директорското место доколку му понудат, Галетановски вели дека сериозно би размислил.

– Огласот е сè уште отворен. Пробиени се сите рокови за жалби. Искрено би размислил, би се вратил само поради вработените и поради животните. Настрана цела поддршка од вас, новинарите, и од јавноста, за тоа сум многу благодарен. Секогаш сум ја имал, но ако би се вратил, би се вратил да пробам да им помогнам, што во моментов би било тешко, но би се вратил само поради нив – вели тој.

За тоа како се финансира ЗОО Скопје и од каде доаѓаат пари, Галетановски вели дека тоа е самофинансирачка институција која се финансира од влезници.

– Дел од трошоците ги покрива Градот Скопје, тоа е некој мал дел од буџетот. Исто така мал дел се слева од Министерството за култура, но тој фонд на финансирање не е доволен за да се покријат режимските трошоци, К-15, за вработените и друго – вели тој.

Во времето додека бил директор месечната сметка за струја била околу 500.000 денари, а за вода 250.000 денари. Сега таа сума е 30 до 40 отсто повисока.

– Секоја чест како се одржува, коклу што знам Градот одвојува мал буџет, кога бев директор зад Зоолошка стоеја сериозни фирми, не беше проблем финансирањето. Посетеноста беше загарантирана, 15.000 карти неделно се околу 20.000 евра. Знаете дека има пари за сè. И за плати, и за храна и за К-15 да ги наградите на крај на годината- вели Галетановски.

За картата која се плаќа од 80 денари вели дека е прениска. Доколку се врати во ЗОО прво што ќе направи е организација, бидејќи вели дека ја нема.

– Мора да се врати другарската хемија што сме ја имале, сите лоши работи да излезат од таа институција, да се концентрираме на разработување, би направил програма со детски претстави, со настани, и второ би ги обновил сите контакти со странство, да се донесат нови животни, да се забрза враќањето во Европската асоцијација за зоолошки градини и аквариуми, тоа е исто клучна работа. И понатаму чекор по чекор, вели Галетановски.