Во СУГС „Кочо Рацин“ во скопската населба Ѓорче Петров утре, 8 мај, организираат отворен ден за сите идни средношколци.
Училиштето нуди гимназиско образование, економски, текстилен смер и од неодамна нов образовен профил за право. Ова е единствено скопско училиште со текстилно-кожарска струка, вели за „Слободен печат“ Катерина Сапунџиева-Димова педагог од училиштето, која ни објасни кои се сите предностите на ова училиште, по што се разликува од останатите и ни најави како е замислен да изгледа отворениот ден.

-Целта е да им понудиме на идните ученици нешто поинтересно, поразлично од другите училишта да бидат вклучени во активностите. Организираме во работилници, како ликовна работилница, работилница по македонски јазик каде што ќе треба да направат и една драмска изведба, ќе има работилница квиз на пари, којашто ја подготвуваат економско-правната и трговската струка, а предвидена е имодна ревија – рече Сапунџиева-Димова.

Поради малиот број на ученици и дуалното образование интересот за ова училиште од година в година расте. Интересот за текстилната струка е послаб, како што вели професорката Емилија Савеска, која предава повеќе стручни предмети во текстилна струка.

-Интересот за текстилната струка е послаб, но ме радува тоа што имаме и ученици кои се прекрасни, кои се со одличен успех, со сите петки, а се запишуваат во текстилната струка, со многу љубов, бидејќи во нашата струка мора да имаат љубов кон работата, за да можат тие да се изразат креативно. Иако стереотипно се мисли дека ова е смер за ученици со послаби оценки, мораме да го поправиме тоа размислување, бидејќи кај нас многу често доаѓаат одлични ученици. Во Македонија мислам дека се повеќе имаме успешни личности во таа насока и се надевам дека од нашето училище ќе излезат вистински квалитетни професионалци во однос на работата во модната индустрија – вели таа.

Учениците од оваа насока имаат загарантирана работа

– Со завршување на оваа насока учениците имаат загарантирана работа. Преку праксата што им ја нудиме за време на образованието во одредени фирми учениците покрај тоа што се стекнуваат со знаење, добиваат и практилчни вештини, а многу често се случува потоа фирмите каде што оделе на пракса, по завршувањето на образованието да ги задржат да работат кај нив – вели проф. Савеска.