Претприемништво, бизнис, култура, право, архитектура, невладини организации и психологија се седумте панел дискусии кои ќе се одржат на втората конференција „Чувари на мудроста“ закажана на 11 јуни во Младинскиот културен центар во организација на Халк банка, како една општествено одговорна компанија која мисли на идните генерации.

Сите студенти и воопшто млади луѓе се поканети да бидат дел од оваа, за нив можност, да научат од успешните, влезот е бесплатен, вели Тамара Џекова за „Слободен печат“.

– Оваа година се потрудивме да ја организираме конференцијата, така што ќе биде соодветна за секој студент, опфаќаме повеќе области, но ги каниме да присуствуваат на секој панел за да можат да научат од говорниците кои се навистина реализирани луѓе во својата професија. Првиот панел ни е панел на тема претприемништво каде ќе говорат проф. Радмил Поленаковиќ, од Машинскиот факултет и Нина Ангеловска, поранешна министерка за финансии и основач на „Групеr“. Третиот панел ни е панел бизнис. Ќе говорат господин Живко Мукаетов, македонски стопанственик и Петар Ниновски, CEO на Бренстер и Бренстер Next College. Од областа на културата ги имаме Искра Гешовска, теоретичарка на уметност и Јасмина Поповска, редовен професор на Институтот за филозофија на филозофскиот факултет. Во панелот за невладини организации панелисти се Ирина Јаневска, сопственичка и претседателка на АРНО и Неда Малеска, основач и извршна директора на Центрот за управување со промени. Од областа на архитектурата ги имаме проф. Мишко Ралеф и Пако Радовановиќ, наградуван архитект. На тема право ќе зборуваат проф. Бобан Мисоски, редовен професор и продекан на правниот факултет Јустинијан Први и проф. д-р Саво Климовски. Последниот панел ни е од областа на психологијата каде панелисти се Славица Гајдазис-Кнежевиќ, примариус доктор-невропсихиатор, и Катарина Димова, којашто е специјален едукатор и рехабилитатор – вели Џекова.

Присутните ќе имаат исклучителна можност да поставуваат директно прашања до панелистите, појаснува таа, преку апликација на анонимен начин со цел да го охрабриме секој да го постави посакуваното прашање.

– За разлика од минатата година, панелите овојпат ќе бидат со по двајца панелисти, пример на еден поискусен, повозрасен учесник и другиот помлад успешен во истата област, сметаме дека ќе биде интерсно да се слушнат две различни приказни за слична професија – вели Џекова.

Минатата година присутните ученици, а пред сè младите во публиката изразиле големо задоволство од искуството стекнато на „Чувари на мудроста“.

Сите заинтересирани треба да се пријават однапред на онлајн платформата на „Чувари на мудроста“, а за останатите предвидено е видео-бим на влезот на МКЦ каде што во живо ќе може да се следи конференција.

Повеќе детали околу настанот погледнете низ целиот разговор во продолжение: