Што е дискус хернија? За каков тип на болест станува збор? Кои се симптомите? Има ли ризични групи? Какви болки чувствуваат пациентите? Има ли лек? Како се лекува и кога треба да се оперира? Дали болеста може да предизвика траен инвалидитет? На овие теми, утрово разговараме со доктор Миленко Костов, специјалист по неврохирургија од приватната болница „Аџибадем-Систина“.

Докторот вели дека дискус хернија е многу честа појава и е болест на модерното време. Најчести симптоми се долногрбна болка како резултат на излегување на дискот кој приклештува нерв.

– Понекогаш може да биде проследена и со хернијација, односно со излегување на интервертебралниот диск, што се наоѓа помеѓу прешлените на кичмата и може да излезе дали во лево или во десно и да го притисне нервот којшто е задолжен за движење на левата или десната нога – вели Костов.

Тој објаснува дека најчесто оваа долногрбна болка успеваат да ја средат конзервативно, односно пациентот прима аналгетска терапија. Потребно е пациентот да мирува и да ги смени своите животни навики. Кај помал дел од пациентите потребно е да се направи магнетна резонанца на грбниот дел, а само кај 10 отсто од случаите е потребно да се направи и оперативно лекување.

-Индикација за оперативно лекување се упорна болка која не поминува и трае од 6 до 8 недели, нагло паѓање на стапалото, односно неможност да се застане на прсти или на петица. Во тој случај, треба да се оперира, се ослободува нервот којшто е притиснат, а потоа пациентот после неколкудневно лежење во болница започнува со физикална терапија којашто е вистинскиот лек за состојбата. Но, да не заборавиме дека само вака мултидисциплинарно, оваа болест може да се излекува – вели Костов.

Тој објаснува дека секоја болка во кичмениот столб не значи дека е дискус хернија. Најчесто се работи за истегнување на мускулите, на тетивите, на лигаментите.

-Битно е да се напомне дека кога има дијагностицирана дискус хернија има промени во начинот на лекување. Ако до сега пиевме аналгетик само кога имаше болка, сега аналгетици се пијат во континуитет неколку денови, некогаш и по неколку пати дневно. Нешто налик како што примаме антибиотик – вели Костов.

Што се однесува до старосните групи, пациентите порано биле од 40 до 50 години. Последните десетина години границата значајно се намалува. Сè повеќе помлади пациенти имаат потреба од оперативно лекување на дискус хернија.

-Има два различни моменти коишто треба да се одвојат тука. Едниот е дека многу млади луѓе внимаваат на својот изглед и на своите спортски навики и доста се занимаваат со вежбање, особено одат во теретана. Друга група пак воопшто не ни помислува на истото, па често заради долготрајно седење се со дискус хернија – вели Костов.

Најмладиот пациент којшто го оперирал е матурант, но имал генетски предиспозиции за оваа болест. Имал мајка и баба коишто имале потешкоти од сличен карактер.

– Кога еднаш ќе се појави, може повторно да излезе дискот ако не ги смениме нашите животни навики, бидејќи самата интервенција не подразбира вадење на целиот диск за да не се наруши статиката на нервот. Самата интервенција трае околу еден час, но важно е да се истакне дека има протокол заради безбедност на пациентот. Целата интервенција се прави под микроскоп. Пациентот станува веднаш после интервенција, а наредниот ден се пушта на домашно лекување. После вадењето на конците и резовите коишто се сега многу мали, третманот продолжува во Премиум центарот каде што се спроведува физикална терапија со медицинска рехабилитација. Болниот добива едукација за како и што треба да прави, кои вежби да ги прави, има консултација со нутриционист, доколку е потребно – вели Костов.

Со дикус хернија може да настане и траен инвалидитет. Кога контролата на свинктерите е загубена, болката е голема и не поминува со аналгетици, пациентот мора да се оперира во период од 48 часа. Кога стапалото е паднато, тоа не може да се движи нагоре-надолу и може да настане делумен или целосен инвалидитет.