Не сум сигурен дека ќе најдам соодветни зборови како да ја опишам ситуацијата и институционалното задоцнување на државата, вели Александар Саша Димитријевиќ, новиот генерален секретар на СДСМ, во реакцијата на синоќешното дивеење во Скопје, кое што беше дел од репертоарот на одбележувањето на Денот на албанското знаме.

Во интервјуто дадено за Слободен печат, Димитријевиќ во име на партијата го осуди хулиганското и наилничкото однесување на дел од оние што го славеа албанското знаме, ставајќи акцент на отуството на полицијата во одржувањето на јавната безбедност на граѓаните.

– СДСМ најстрого го осудува чинот на скревнавење на македонското знаме, пукање со калашникови, понижување низ улиците на Скопје и тоа е апсолутно неприфатливо за една нормална држава. Она што СДСМ во континуитет претходните шест месеци континуирано го говореше, на коешто ставаше акцент е небезбедноста на улиците, со над 20 обиди за убиство и немили сцени низ целата држава, а тоа вчера кулминираше. Видовме едно тотално закажување на институциите и нешто што најмногу ме плаши е однесувањето на владејачката гарнитура, која се однесува како сè уште да е во опозиција – вели Димитријевиќ.

Напомена: Интервјуто на Димитријевиќ во студиото на Слободен печат беше снимено пред прес-конференцијата на министерот за внатрешни работи Панче Тошковски, на која беше објавено дека повеќе лица поврзани со немилите настани во Скопје се уапсени.