„Британија оди во целосен сталинизам“, напиша Илон Маск на социјалната мрежа „Икс“. Ова е уште една од низата провокации коишто Маск ги има кон британската влада. Тој ја критикува одлуката на лабуристичката влада за зголемување на данокот на наследство на фарми вредни повеќе од еден милион фунти. Како Британците ги толкуваат овие коментари на Маск и дали се некаква порака за понатамошните политички влијанија на САД врз Британија разговараме со нашата дописничка од Лондон, Жанета Скерлев.

-Да беше Илон Маск само Илон Маск и да немаше никаква врска со новата идна американска влада, ќе кажевме добро, ете, тој е познат по разни провокативни изјави, но мислам дека овој пат треба да се земе малку посериозно, не заради изјавата која е прилично глупава, не оди земјата во сталинизам, толку заради неговата улога во идната администрација на Трамп – вели за „Слободен печат“ Скерлев.

За добар дел од луѓето во Велика Британија медиумите требаше да објаснат што е тоа сталинизам, нагласува Скерлев, која додава дека со оваа изјава не се засегнати граѓаните, но засегнати се политичарите.

-Велика Британија и новата влада, на чело со Кир Стармер, се обидува да воспостави нови односи со Соединетите Држави, секогаш традиционално односите помеѓу Велика Британија и Соединетите Американски Држави биле добри, историски на моменти и одлични. Има ставови дека Велика Британија има на некој начин понизен однос кон Соединетите Држави. Онаа познатата изрека: Ако Американците кажат „џамп“ Британците ќе прашаат колку високо. Ќе видиме Трамо каков однос ќе има со надворешната политика – рече таа.

Лабуристите се обидуваат да соберат пари во државната каса и предложија за сите фарми кои се вредни над еден милион фунти, данокот на наследство да биде 20 отсто. Ова предизвика револт кај фармерите кои со генерации не плаќале ништо. Илон Маск ја искористи приликата и застана зад фармерите.
Британската влада го повика Маск да сведочи пред Комитетот за информатика на почетокот на идната година бидејќи има истрага против платформата „Икс“ за споделување лажни објави, дезинформации и ширење на говор на омраза за време на протестите во Британија кога беа убиени три девојчиња.