Во изминативе години, во медиумскиот простор се појави нов формат на обраќање кон јавноста, наречен поткаст, што претставува еден вид емисија, која најчесто се објавува на стриминг платформи, како Јутјуб и Спотифај.

Во Македонија во моментов има доста активни поткасти на кои се дискутира за најразлични теми како спорт, политика, најразлични анализи, шоу-бизнис поткасти и слично. „Слободен печат“ ги праша граѓаните дали би снимиле поткаст и на која тема?

На оваа тема од речиси сите анкетирани добивме позитивен одговор на прашањето дали би снимале поткаст. Со вас споделуваме дел од темите кои им се привлечни на граѓаните за да креираат свој продукт.

– Секој ден со мојата колешка разговараме за тоа дека би снимале женски поткаст во кој ќе може да се информираат сите за некои актуелни женски теми, особено машките, кои може не нѐ разбираат толку многу нас – изјави една студентка.

Една студентка ја сподели и својата идеја за поткаст наменет на животните.

– Поткастот би бил на темата животни, бидејќи мислам дека недостасуваат такви емисии,  поголема свесност за тие теми, не само за кучиња и мачиња, туку и општо за домашните миленичиња – рече една од анкетираните.

Анкетираните споделија и други идеи како: екологија, студентски живот, интервјуа со познати личности од Македонија и Балканот и слично.