Ли Вилсон од Канзас, САД одлучил да одгледува сосема поинаква култура од она што обично го одгледува поради една многу посебна причина, пишува „Еј-би-си“.

Имено, тој и неговата сопруга Рене Вилсон ќе ја прослават нивната златна свадба (50 години брак) на 10 август, па по тој повод Ли засадил дури 1,2 милиони сончогледи за својата сакана.

„На 10 август славиме 50 години брак. Многу размислував за тоа што да ѝ подарам на сопругата, а отсекогаш знаев дека обожава сончогледи. Па, помислив да ги засадам оваа година – 32 хектари“, вели Ли.

Човекот ги засадил растенијата во мај, а тоа го направил тајно за да не дознае Рене.

„Јас сум целосно воодушевена. Се чувствувам многу посебно. Не постои посовршен подарок од поле со сончогледи“, изјави Рене.

Двајцата се заедно речиси цел живот, а тоа било љубов на прв поглед.

„Се запознавме во средно училиште. Таа не можеше да излегува до 16 години, па ѝ се јавив на нејзиниот 16. роденден и тогаш почнавме да се забавуваме. Нашиот прв состанок беше на забава со ролшули“, се сеќава Ли.

Овој романтичен гест привлече огромно внимание на социјалните медиуми, па голем број луѓе одвоија време да го посетат полето со сончогледи на Ли и да се фотографираат со таа прекрасна глетка.