Уште една пациентка денеска е упатена од матичен лекар да се тестира за птичји грип во Институтот за јавно здравје, изјави директорката на ИЈЗ доктор Марија Андоновска во интервју за „Слободен печат“.

– После последните случувања веројатно луѓето се вознемирени и очекуваме дека во следниот период ќе имаме луѓе што ќе доаѓаат со или без упат кои ќе сакаат да бидат тестирани за птичји грип.

Денеска во ИЈЗ дојде пациентка со упат од матичен лекар која треба да се тестира за птичји грип.

Во моментов нашите епидемиолози спроведуваат епидемиолошка анкета и ќе проверат дали таа имала контакт со заболена или мртва живина.

Во текот на денот ќе ги знаеме резултатите од тестирањето, рече доктор Андоновска.

Лабораторијата во Институтот за јавно здравје е меѓународно акредитирана и референтна за дијагностицирање на грип од анимално и од хумано потекло.

Директорката Андоновска во интервјуто открива дека иако четири лица вработени во Зоолошката градина беа ставени под здравствен надзор, вчера тој статус им бил одземен затоа што Комисијата за заштита на населението од заразни болести решила дека тие не треба да се под здравствен надзор.

Здравствениот надзор не е исто што и одење во карантин, туку само значи дека здравствената состојба на овие лица треба да се следи и епидемиолог секој ден да им се јавува и да ги прашува дали развиле сипмтоми.

– И двајцата вработени во Зоолошката градина кои вчера беа тестирани се негативни.

ИЈЗ во моментов располага со тестови за птичји грип. Одделот за епидемиологија при Институтот ги следи и заразните и незаразните заболувања и во Македонија и во регионот.

Информациите на нашите епидемиолози се дека во регионот и во Европа не постои заболен човек од птичји грип во моментов.

Поради тоа, годишните програми предвидуваат одредена количина на тестови бидејќи ценеле дека нема потреба од огромна бројка на тестови бидејќи нема таква индикација.

Располагаме со солидна бројка на тестови. Тие реагенси се навистина скапи.

Ќе ја следиме ситуацијата и ако се јави потреба ќе набавиме уште тестови, додава Андоновска.

Директорката ја коментираше и реакцијата на Зоолошката градина од каде на Фејсбук излегоа со објава дека „бил извршен масакр на птици без налог и доказ“.

– Кога се работи за животот и здравјето на граѓаните, треба да бидеме малку повнимателни со изјавите и политиката да ја оставиме на страна и да излеземе со реални информации за да не создаваме паника кај луѓето.

Од она што сум информирана, постапено е согласно протоколите и позитивните законски прописи како што треба да постапат институциите во ваква ситуација. Јас сметам дека сите институции реагираа навистина многу брзо.

ИЈЗ не чекаше и во саботата и во неделата работевме, испитувавме, се правеа епидемиолошки анкети.

Сметам дека брзата реакција е она што треба да се случува и во иднина, посочи Андоновска.

Од информациите што директорката ги добила од епидемиолозите во ИЈЗ, за луѓето да заболат од птичји грип, тие треба да бидат во навистина близок контакт со живина која е болна или мртва или да имаат контакт со отпадоци, секрети или измет од заболена или мртва живина.

– Што значи дека шансите за да заболи некој се навистина мали.

Сиптомите што ги дава птичјиот грип се слични на оние од обичниот грип – температура, малаксаност, болки во грло, течење на нос, промени во смисла на конјуктивит, дијареа и слично.

Симптомите се движат од благи кон потешки. Но како што споменав, шансите во моментов се мали, изјави Андоновска.

Зоолошката градина останува затворена за посетителите наредните 28 дена.

– Затворањето е под ингеренции на АХВ и ветеринарниот институт.

Затворањето на два инкубациски циклуси двапати по две недели е за да може да се испитаат и останатите животни во Зоолошката градина.

Не се знае точно колку време овој вирус циркулирал во Зоолошката градина.

Овој период ќе биде доволен да се испитаат и останатите животни и да се преземат останатите мерки таму за да биде таа функционална со посетителите, рече Андоновска во интервјуто за „Слободен печат“.

Двајцата вработени од скопската Зоолошка градина не се болни од птичји грип, соопшти ИЈЗ

Има ли место за страв од птичјиот грип?