Луксузната јахта што вчера се насука во заливот Завала на хрватскиот остров Хвар денеска е успешно извлечена, јавија локалните медиуми. За среќа, штетата е минимална.

Луксузната суперјахта „Репосадо“, од флотата на „Трамонтана Јахтс“, е долга 52 метри и претставува извонреден спој на едриличарската елеганција и комфорот на суперјахтите. Јахтата има шест кабини со капацитет од 12 патници, џакузи за осум луѓе и редица други луксузни и модерни карактеристики. Таа чини околу 13 милиони евра, а според достапните информации, се изнајмува за пловидба по Медитеранот за цена од 115.000 до 155.000 евра неделно.

На почетокот на месецов, супермодерното пловило триумфираше на Меѓународните награди за јахти и авијација 2025 во Монте Карло, освојувајќи ја наградата за најдобар дизајн во категоријата едриличарски јахти. Сепак, таа вчера се насука на опасен гребен во заливот Завала.

„Нема оштетување на трупот, само неколку гребнатини. Свети Анте нè штитеше“, рече сопственикот на бродот по успешното извлекување, заблагодарувајќи им се на сите што му понудиле помош.

„Навистина ви благодарам од срце за вашата загриженост. Добив повеќе од 100 повици од луѓе што нудеа помош. Чест и големо задоволство е да живеам тука и да работам со такви луѓе. Во мое име и во име на целиот тим – ви благодарам од срце“, рече тој.