Полицијата денеска уапсила 21-годишен жител на Скопје во чијшто дом при претрес се пронајдени четири килограми марихуана, паковки со кокаин и пиштол, соопшти МВР.

„Денеска (07.05.2025) од страна на полициски службеници од Единицата за недозволена трговија при СВР Скопје, по претходно обезбедена судска наредба за претрес на дом и други простории, извршен е претрес кај А.С.(21) од Скопје. При претресот, во помошна просторија која ја користел А.С. се пронајдени и одземени четири килограми марихуана, 18 паковки кокаин, една дигитална вага, еден боев пиштол ЦЗ 7.65 со пет куршуми итн. А.С. е лишен од слобода и против него ќе биде поднесена кривична пријава по чл. 215 и 396 од КЗ, по итна постапка“, велат од полицијата.