Од денот кога исчезна 14-годишната Вања Ѓорчевска, полицијата имала неколку теории, од кои едната е дека доброволно влегла во автомобил и се оддалечила во возило со некого, а втората дека можеби е со „виртуелното момче“ од Шведска. Додека СВР Скопје да ги елиминира овие теории – таткото Александар Ѓорчевски и неговиот кум Гоце Трајковски работеле на прегледување на камерите од видео-надзорот во околината на зградата во Дебар Маало и на СВР Скопје први му предочиле дека возилото „цитроен“ што се движи пред зградата, е сомнително.

Дејан Димовски, началник на единицата за насилен криминал денеска сведочеше пред судот но рече дека и покрај тоа што полицијата ги имала тие снимки, ним возилото „цитроен“ не им било сомнително додека Александар не го посочил бидејќи возилото не било по ништо специфично на снимката.

-Цел радиус околу зградата направивме, излезот од зградата беше во мртов агол, без ниедна камера да го снима, ама десет метри лево и десно, ако одела пешки – некоја камера ќе ја фатела. Така знаевме дека е замината во автомобил. Претпоставувавме дека доброволно влегла во некој автомобил, зашто во спротивно, имаше на камерите работници од „Комуналец“, ќе забележеле нешто, а тие на снимките најнормално си метеа – рече Димовски. 

Адвокатот на Александар Ѓорчевски пак, Владимир Туфегџиќ, вели дека Александар уште од 29-ти, пред полицијата преку врски во „Сејф сити“ дознал дека за возилото „цитроен“ има потрага.

-Самиот потврди дека немал сознанија дека Александар и Гоце уште од 29-ти веќе ги имале сознанијата преку нивни пријателски врски во Сејф сити дека посоченото возило „цитроен“ е предмет на потрага од претходните денови. Потврди дека фамозниот пресечен кабел, дека ресиверот е празен и нема видео записи таму подолго време наназад – рече адвокатот на Александар Ѓорчевски, Владимир Туфегџиќ.

Обвинетиот Љупчо Палевски побара од началникот да го опише исказот што во станица го дал обвинетиот Велибор Манев. Судот дозволи, а началникот рече:

-Кажа дека утрото спиеле во куќата на партијата „Десна“, во 5 часот и 30 минути станале. Кешишев отишол пешки да наполни бензин од блиската бензинска станица. Сите заедно сте отишле во Радишани каде бил препаркиран „цитроенот“, па сте тргнале – рече началникот.

Началникот Димовски рече дека на камерите на Сејф сити, му било сомнително што Александар Ѓорчевски дента на исчезнувањето на Вања, се упатил накај Качанички пат. Но адвокатот Туфегџиќ вели дека одел накај границата и не само таму, туку Ѓорчевски одел на бројни локации да бара во тие денови.

–  Во разговорите со Велимир и со Боре тие рекоа дека таткото на Вања му кажал на Палчо дека Вања ќе оди сама кон школо. Најдовме порака, скрин шот од неделата навечер од разговор на Вања и Александар, кој ѝ го препратил на Зорица во која тој им вели на децата „утре ќе биде ладно, мунус 7, облечете се многу добро, со дуксер, шал, ракавици…“ Еден ден Александар ѝ рекол на Зорица, „не се секирај, ако побараат откуп, ќе земеме пари од Хари“. Во групата со родители на Вибер, Александар ја згрешил групата и напишал „кажи колку пари треба“, ама брзо ја избришал пораката. Но некои родители ја виделе и ни кажаа – рече Димовски.