Фудбалерите на третолигашот Арминија Билефелд приредија сензација со пласманот во финалето на Купот на Германија откако во полуфиналето го совладаа бранителот на титулата Баер Леверкузен со 2:1. Ова е најголемиот успех во историјата на клубот, основан пред 119 години.

Минатогодишните двојни освојувачи на круната се чинеше дека ќе слават рутински откако Џонатан Тах ги доведе гостите во предност во 17 минута.

Но, само три минути подоцна Арминија израмни со голот на Мариус Ворл, а во последните моменти од првото полувреме домашната екипа го сврте резултатот со голот на Максимилијан Гросер.

Така, Баер стана четвртиот бундеслигаш кој е елиминиран од Арминија на патот до финалето по Вердер, Фрајбург и Унион Берлин.

Во второто полуфинале на германскиот Куп во среда се среќаваат Штутгарт и РБ Лајпциг. Финалето ќе се игра на 24 мај во Берлин.