Легендарниот актер и борач Хулк Хоган (70) се ожени по третпат, овојпат со неговата избраничка Скај Дејли (45). Тие ја објавија свршувачката во јули годинава, по една година врска, објави „Пејџ сикс“.

Борачот и инструкторката по јога го изговориле судбоносното „да“ пред мал број роднини и пријатели во Клирвотер, Флорида. Интимната свадбена церемонија се одржала во баптистичката црква „Индијан рокс“.

Дејли избрала бела венчаница без ракави од брендот „Ру де Сејн“, а косата ѝ била пуштена и кадрава. Целиот изглед го надополнила со 18-каратни обетки од бело злато, нараквица и ѓердан, заедно со венчалниот прстен, за кој се претпоставува дека вреди околу 500.000 долари.

Хоган, пак, носел традиционален црн смокинг и својата препознатлива црна марама на главата.

Извор за „Дејли мејл“ споделил дека двојката ја донела одлуката за венчавката во последен момент.

„Се работеше за скромна венчавка. Никој од нив двајца не сакаше нешто големо, туку само мал собир со најблиските и најдрагите личности, пред кои ќе ја искажат својата длабока љубов“, изјавил изворот.

Најстарата ќерка на Хоган, Брук, наводно, не стигнала на церемонијата. Сепак, неговиот син, Ник бил присутен. Трите деца на Дејли биле, исто така, присутни за да бидат сведоци на бракот на нивната мајка.