Пратеничката од СДСМ, Јована Тренчевска повика на доследнопочитување на законите, навремена и ефикасна реакција од сите надлежни институции за заштита, спречување и превенција од насилство врз жените.

Тренчевска во име на Клубот на жени пратенички на денешната прес-конференција во Собранието посочи дека Клубот на пратенички едногласно ги поддржа измените на Кривичниот законик, со кои фемицидот за првпат се препознава и третира како кривично дело. Таа нагласи дека жените не смеат да живеат во страв, а институциите мора да преземат мерки за превенција и спречување на насилството.

„Бараме од надлежните институции да ги преземат сите мерки за заштита на жртвите и превенција на фемицидот. Бараме од судските органи да ја имаат во предвид ратификуваната Истанбулска конвенција и одредбите од Кривичниот законик којшто се усогласени со истата“,
изјави Тренчевска.

Реакцијата доаѓа по двојното убиство во Велес, како и зачестените насилства врз жените што се случија во државата.

Според Тренчевска, насилството врз жените мора да биде јавно осудено и институционално санкционирано.

„Ние, жените од парламентот, едногласно, остро и силно ги осудуваме зачестените случаи не само на свирепо насилство, туку и на фемицид. Ова реакција на Клубот на жени пратенички сакаме да допре до сите граѓани и до сите институции во државата со цел ефикасна превенција, заштита и спречување на насилството врз жените“, изјави Тренчевска

.

Ново сведоштво | Пред 12 години го пријавила убиецот на Росица во полиција: „Јас можев да бидам на нејзиното место“