Тања Тас македонската јавност ја памети како пејачката на групата „Темпера“, а сега повторно е активна како соло изведувач. Таа неодамна ја сними песната „Лакмус“, чиј автор е Игор Атанасоски – Харе, со кој веќе имаат соработувано, а кој ги напиша музиката и текстот за песната. Аражманот е на Дамир Имери, а музички продуцент е Мите Димовски.

Харе соработува со Тања Тас подолг период, тие беа дел од многу проекти, меѓу кои се „Autmind“ и албумот со Игор Џамбазов „Првите 30“, каде таа ги пее придружните вокали.

Песната, како што вели Харе е малку поразлична од она што тој го создава во последниот период.

– „Лакмус“ ја создадов пред десет години и ете го чекаше трпеливо своето време, да се најде во рацете на вистинскито пејач, а во случајот тоа е Тања Тас. Таа е плод на мојата желба постојано да истражувам, барајќи нови музички хоризонти. А нејзиниот специфичен звук и текст се должат на тоа што јас не калкулирам, едноставно го вадам тоа што го чувствувам во себе – вели авторот Игор Атанасоски – Харе.

Песната „Лакмус“ доби и свој видео запис, кој го режираше и сними Александар Ристовски.