Познатата пејачката Енџи Стоун, која се прослави како член на пионерското женско хип-хоп трио „Sequence“, а подоцна стана истакната соул пејачка, почина на 63-годишна возраст.

Стоун загина во сообраќајна несреќа во Монтгомери, Алабама во саботата рано наутро.  Таа беше најпозната по нејзиниот хит од 2001 година „Wish I Didn’t Miss You“.

Претставникот на Енџи Стоун потврди дека таа се враќала од снимање заедно со членовите и пејачите на нејзиниот бенд, кога автомобилот во кој патувала се превртел. Стоун е единствената загината во несреќата.

За време на нејзината кариера, таа издаде 10 соло албуми и беше номинирана за три Греми, вклучувајќи ја и номинацијата за најдобра ар-ен-би изведба во 2003 година и најдобра женска ар-ен-би вокална изведба следната година.

Откако групата со која е прослави се распадна, Стоун се приклучи на групата „Вертикал Холд“ и издаде два албума во средината на 1990-тите.

Таа потпиша договор со „J Records“ во доцните 1990-ти, започнувајќи ја својата соло кариера со нејзиниот деби албум „Black Diamond“ во 1999 година.

Минатата година, таа беше примена во Куќата на славните на жените текстописци.