Од Лигата „А“ вечерва репрезентациите на Италија и Белгија им се придружија на Франција и Шпанија кои ќе се борат за трофејот во УЕФА Лигата на нации во периодот од 6-10 октомври 2021 година.

Италијанците во групата „1“ дојдоа и до третата победа на гостувањето кај Босна и Херцеговина (0:2) со головите на Белоти и Берарди. И Холанѓаните се бореа за првото место, победија против Полјаците (1:2), но на крајот завршија само како второпласирани.

Белгија со триумфот над Данска од 4:2 ја освоија првата позиција во групата „2“, а Англичаните беа убедливи со 4:0 против Исланд.

Дури во последниот шести меч од групата „3“ во Лигата „Б“ најдобрата српска репрезентација ја оствари првата победа, но доволно колку да обезбеди опстанок.

Како во стилот на Барселона блескаа Србите на стадионот „Рајко Митиќ“ во Белград и целосно го надиграа составот на Русија со 5:0. Два гола запиша Јовиќ, а по еден Радоњиќ, Влаховиќ и Младеновиќ. Во нивни прилог одеше и поразот на Турција на гостувањето кај Унгарија (2:0). Турците во наредното издание ќе играат во Лигата „Ц“.