Српскиот фудбалер Јан-Карло Симиќ кој има само 18 години се прослави на дебито за Милан влегувајќи од клупата во 23 минута и постигнувајќи го првиот гол 17 минути подоцна.

Симиќ, кој игра на позицијата централен бек од денеска е третиот најмлад стрелец на „росонерите“ откога во Италија победите се вреднуваат со три бода, а тоа е скоро 30 години.

Србинот дебитанскиот гол го постигна со 18 години и 299 дена. Одлично му асистираше Рафаел Леао за зголемување на предноста (2:0) на дуелот дома против Монца во 16 коло од Серија А.

Претходно првиот гол на домаќините беше дело на Рејндерс во третата минута по асистенцијата на Пулишиќ.

Конечниот епилог го постави Окафор по асистенцијата на Жиру во 76 минута од средбата на стадионот „Сан Сиро“ во Милано.

После 10 победа сезонава Милан е на третото место со 32 бодови, додека Монца по петтиот пораз во италијанскиот шампионат е на 11 позиција со 21 бод.