Италијанските опозициски лидери ја повикаа десничарската влада на Џорџа Мелони да ги забрани неофашистичките групи откако се појавија снимки на кои се гледаат стотици мажи како фашистички поздравуваат на настан во Рим. Толпата се собра пред поранешното седиште на Италијанското социјалистичко движење (МСИ), неофашистичка партија основана по Втората светска војна, која на крајот прерасна во партијата Браќата на Италија, чиј член е Мелони.

Годишниот собир во источниот дел на градот вчера ја одбележа 46-годишнината од убиството на тројца млади милитанти на сега веќе непостоечката партија. На видеото, кое е масовно споделено на Интернет, мажите стојат во редови, се поздравуваат со вкочанети раце и трипати извикуваат „присутни“.

„За сите паднати соборци“, извика еден од групата, а Гардијан пишува дека е типичен извик на нео-фашистите. „Рим, 7 јануари 2024 година. Чувството е како 1924 година. Она што се случи е неприфатливо. Неофашистичките групи мора да бидат распуштени, како што е наведено во уставот“, напиша Ели Шлајн, лидер на Демократската партија.

Roma, Italia, 2024.
Vergogna di Stato. #AccaLarentia pic.twitter.com/yR7VtvmfVR

— Paolo Berizzi (@PBerizzi) January 7, 2024

Мелони се огради од фашизмот

Карло Календа, лидер на центристичката партија Акција изјави: „Ова е неприфатлив срам во европската демократија“. Фашистичкиот режим на Бенито Мусолини ја презеде власта по „Маршот кон Рим“ во октомври 1922 година, а во април 1924 година обезбеди убедлива победа на општите избори пред да го затвори повеќепартискиот систем на Италија.

Реорганизацијата на фашистичката партија на Мусолини беше забранета со повоениот устав на Италија, кој исто така забрануваше изразување на фашистичката идеологија и пропаганда. Сепак, неофашистичките групи како што е МСИ, основана од Џорџо Алмирате, министер во владата на Мусолини, успеаја да ја заобиколат забраната, користејќи друго име и тврдејќи дека се нова политичка сила.

Браќата на Италија, партијата на италијанската премиерка, е политички потомок на МСИ. За време на нејзината изборна кампања, Мелони се обиде да ја оддалечи својата партија од нејзините неофашистички корени, велејќи дека пред неколку децении го испрати „фашизмот во историјата“.

Никој не одговараше за смртта на тројцата тинејџери

Денеска Фабио Рампели, член на Браќата на Италија и потпретседател на Долниот дом, изјави дека партијата е „светлосни години“ далеку од неофашизмот. Тој истакна дека, иако Браќата од Италија не се откажале од „споменот на трите момчиња варварски убиени пред 46 години“, „тие не учествуваат во овој тип на демонстрации“.

– Тоа не е наш стил, тоа не е наша филозофија, додаде Рампели.

Министерот за надворешни работи Антонио Тајани, кој ја предводи партијата Форца Италија инаку коалициски партнер на Мелони, смета дека секоја прослава на диктатурата треба да биде осудена.

Годишните комеморации за убиствата од Ака Ларентиа се одобрени од локалните и регионалните власти.

Двајца членови на младинското крило на МСИ, наводно, биле убиени од левичарски милитанти на 7 јануари 1978 година. Третиот бил убиен подоцна истиот ден од полицијата откако избувнале немири. Сите тројца беа тинејџери. Никој не беше осуден за нивните убиства.

Слична комеморација се одржува во Милано секој април во спомен на неофашистички милитант кој беше убиен таму.