Рускиот картинг возач Артјом Северјухин се извини за непримерниот поздрав кој го упати од подиумот по победата во првото коло на Европското првенство во Портимао.

Северјухин во неделата победи во првото коло на Европското првенство, а по триумфот направи гест кој изгледаше како нацистички поздрав. Тој прво се удри во градите пред да ја подигне десната рака додека се изведуваше италијанската химна.

Младиот 15-годишен Русин се натпреварува благодарение на италијанската лиценца, бидејќи руските возачи беа исфрлени од меѓународни натпревари поради агресијата врз Украина.

Северјухин се извини и рече дека „никогаш не го поддржувал нацизмот и го смета за едно од најужасните злосторства против човештвото“.

– Изведов гест на подиумот што многумина го сфатија како нацистички поздрав. Но, тоа не е вистина, јас никогаш не го поддржувам нацизмот. Се натпреварував под италијанска лиценца и победив на трката под италијанско знаме. Момците пред подиумот ми кажаа дека во Италија во случаи кога сакаш да се заблагодариш, обичај е да се удираш во гради. Сакав да го направам тој гест и не можам да објаснам што се случи потоа. Знам дека сум виновен, знам дека сум глупав и подготвен сум да бидам казнет – вели Северјухин, а пренесува „Скај“.

Меѓународната автомобилска федерација (ФИА) го истражува инцидентот, а неговиот тим Ворд Рејсинг го отпушти. Од шведскиот тим изјавија дека се срамат од потегот на 15-годишниот возач.