Мајкл и Ешли Мур од Велика Британија се запознале на Инстаграм во 2018 година. Тој ѝ испратил порака, таа веднаш одговорила, а неколку години подоцна се венчале. Тие го имаат синот Алфи (3), и моментално го очекуваат своето второ дете, кое треба да се роди во јули.

Но, нивната приказна има неверојатен пресврт – двајцата всушност позирале заедно на фотографија од детската градинка, седејќи еден до друг – години пред да се заљубат, без ни да го сфатат тоа.

„Дури додека се селевме и пребарувавме кутии во куќата на моите родители, ја најдовме фотографијата. Не можевме да веруваме – седиме еден до друг! Прекрасно е чувството да се знае дека сме биле еден покрај друг целиот наш живот некаде“, изјавила Ешли за „Дејли мејл“.

Таа ја сподели фотографијата од детската градинка и на Тикток, а луѓето во коментарите се воодушевени од нивната приказна.

Многумина ги споделија своите слични приказни, од бракови до пријатели од детството, до хумористични коментари за тоа како сите сега почнуваат да ги проучуваат сликите од градинка на своите деца во потрага по „идни партнери“.

„Ова е судбина. Не знам како поинаку да ја опишам“; „Прекрасна љубовна приказна“, биле дел од коментарите.

Интересно е што Ешли и Мајкл се забавувале кратко во тинејџерските години, но изгубиле контакт по средното училиште. Тие повторно се споиле преку социјалните медиуми и оттогаш се неразделни.