Денеска на гостински терен во рамките од седмото коло во ракометната ЕХФ Лигата на шампионите екипата на Еурофарм Пелистер славеше против Фредериција во Данска со 25:23.

После првото полувреме водеа домаќините со 12:9, но во вториот дел битолската екипа одигра многу подобро.

Играчите на Звонко Шундовски при 15:15 направија серија од 4:1 за 19:16 на семафорот.

Еурофарм Пелистер одржуваше позитива од два-три голови, разлика, во еден момент имаше и највисоки „плус четири“ (21:17).

Во самиот финиш Фредериција опасно се доближи резултатски двапати на „минус еден“ (22:21, 23:22), но нашиот претставник не дозволи никаков пресврт и до крајот на мечот успеа да постигна уште два гола и да дојде до бодовите.

Кај стрелците во победничките редови шест голови постигна Ф. Кузмановски, а по четири имаа Ж. Пешевски и Тунижанецот О. Хосни.

Ова е прв триумф сезонава за актуелниот македонски првак во ЛШ, во групата А се наоѓа на шестото место со три бодови и ги одржува шансите за пласман во осминафиналето.

Во следното коло Еурофарм Пелистер на домашен терен ќе го пречека истиот противник на 20 ноември.