Фудбалерите на Челси го претрпеа првиот пораз на Светското клупско првенство откако вечерва со пресврт Фламенго славеше со резултат 3-1.

Англискиот тим добро го отвори натпреварот, а предноста ја донесе Педро Нето уште во 13. минута, кога по украдена топка, истрча преку половина терен и прецизно погоди за водство. Тоа беше и единствениот погодок во првиот дел.

Но, во второто полувреме сликата на теренот се смени. Бруно Енрике во 62. минута израмни, а веќе во 65. Данило донесе целосен пресврт за бразилскиот гигант. Само три минути подоцна, Челси остана и со играч помалку, откако црвен картон заработи Николас Џексон, со што надежите за камбек се распаднаа.

Конечниот удар го зададе Валас Јан во 83. минута, кога со третиот гол ја запечати судбината на „сините“.

По два одиграни натпревари, Фламенго има максимални шест бода, Челси останува со три, додека Есперанс од Тунис и Лос Анџелес се уште чекаат на првите поени, а ќе ги одмерат силите во меѓусебниот дуел од второто коло.